Elnur Alıyev qan xərçəngindən əziyyət çəkən 3 yaşlı Musa Yunusova yardım göstərəcək
“Söhbət bir azyaşlı körpənin həyatından gedirsə, onda adamın gözünə başqa heç nə görsənmir”
87 saylı Ağsu-İsmayıllı Seçki Dairəsindən deputatlığa namizəd dünya çempionu, əməkdar məşqçi Elnur Alıyev namizədlikdən imtina edib. Bu barədə tanınmış idmançının özü sosial şəbəkədə məlumat verib. İdmançı bildirib ki, qan xərçəngindən əziyyət çəkən 3 yaşlı Musa Yunusovun həyatını xilas etmək üçün iddiasını geri götürüb.
"Sherg.az"ın xəbərinə görə, yanvarın 16-da, yəni bugün Ağsu rayonunda yerləşən “Ağsu İdman Kompleksi”ndə xeyriyyə məqsədli qanvermə aksiyası keçiriləcək. Aksiya leykozdan əziyyət çəkən 3 yaşlı Musa Araz oğlu Yunusova yardım etmək üçündür. Qanvermə üçün Qan Bankı ilə razılıq əldə olunub və müqavilə bağlanılıb ki, aksiyadan yığılan qanın əvəzinə xəstə körpənin ehtiyacı olduqda Qan Bankı ona lazımı qədər qanı təmənnasız versin.
Aksiyanın təşkilatçısı Ağsu İdman Kompleksinin Direktoru Elnur Alıyev qanvermə aksiyası ilə bağlı sualarımızı cavablandırıb ki, balaca Musanın vaideyinləri hələ ötən ilin dekabrında mənə müraciət edib:
“Məsələni dərhal nəzarətə götürdüm və bu istiqamətdə müvafiq qurumlarla danışıqlara başladım. Qan Bankına müraciət etdik və onlar aksiyanı Yanvarın 16-da keçirməyi təklif etdilər. Bilirsiniz ki, mən də 87 saylı Ağsu-İsmayıllı Seçki Dairəsindən deputatlığa namizəd idim.
Aksiya isə qanunla icazə verilən təbliğat kampaniyasından bir gün əvvələ düşürdü. Qan Bankı isə yanvarın 16-sı gününü təyin etmişdi. Biz qanunu poza bilməzdik. Eyni zamanda məlumat aldıq ki, körpənin vəziyyəti getdikcə pisləşir.
Söhbət bir insanın, xüsusi ilə də bir azyaşlı körpənin həyatından gedirsə, onda adamın gözünə başqa heç nə görsənmir. Bütün bunları nəzərə alaraq və vicdanımın səsinə qulaq asaraq namizədliyimi geri götürdüm və bu aksiyanı məhz bu gün keçirilməsinə qərar verdim”.
