Xəbər verildiyi kimi, 20.12.2020-ci il tarixdə Sabirabad rayonu ərazisində yerləşən pambıq emalı sexində Qürbət İsayev iş zamanı ağır dərəcəli bədən xəsarəti alıb. Bu faktla bağlı Cinayət Məcəlləsinin müvafiq maddəsi ilə başlanmış cinayət işinin istintaqı tamamlanıb.
Sabirabad rayon prokurorluğundan “Sherg.az”a verilən məlumata görə, istintaqla müəyyən edilib ki, “MKT İstehsalat Kommersiya” MMC-nin Sabirabad filialının direktoru Ramil Əsədov, həmin filialın sağlamlıq, əməyin təhlükəsizliyi və ətraf mühitin mühafizəsi üzrə mütəxəssisi Ehtiram Xancanov, xam pambığın qəbulu və emalı şöbəsinin baş mühəndisi Zakir Haqverdiyev və həmin şöbənin mexaniki Eynulla Sadıqov tərəfindən texniki təhlükəsizlik və əməyin mühafizəsi qaydalarının pozulması səbəbindən filialın operatoru Qürbət İsayevin sağ əlinin qurğunun içərisinə doğru dartılması nəticəsində sonuncu ağır dərəcəli bədən xəsarəti alıb:
İş üzrə toplanmış kifayət qədər sübutlar əsasında Ramil Əsədov, Ehtiram Xancanov, Zakir Haqverdiyev və Eynulla Sadıqova Cinayət Məcəlləsinin 162.1 (əmək mühafizəsi qaydalarını pozma) maddəsi ilə yekun ittiham elan edilməklə cinayət işi baxılması üçün rayon məhkəməsinə göndərilib.
