...Həm də regionun yenidən formalaşan geosiyasi arxitekturasında simvolik və strateji mərhələdir
Azərbaycan, Türkiyə və Pakistan arasında üçtərəfli əməkdaşlıq son illərdə yeni keyfiyyət mərhələsinə qədəm qoyaraq strateji tərəfdaşlıq səviyyəsinə yüksəlib. Bu əlaqələr yalnız ikitərəfli münasibətlər çərçivəsində deyil, həm də üçtərəfli formatda çoxşaxəli əməkdaşlıq modelinə çevrilib. Üç dövlət arasında dərin tarixi, dini və mənəvi köklərə əsaslanan münasibətlər son dövrlərdə intensiv siyasi dialoq, iqtisadi təşəbbüslər və təhlükəsizlik sahəsində qarşılıqlı fəaliyyətlə daha da möhkəmlənib.
Azərbaycan, Türkiyə və Pakistan liderləri arasında yüksək səviyyəli görüşlərin təşkil olunması, bu əməkdaşlığın strateji xarakterini təsdiqləyir.
Politoloq Turan Rzayev Sherg.az-a bildirib ki, Laçın Beynəlxalq Hava Limanının açılışı təkcə mühüm infrastruktur layihəsi deyil, həm də regionun yenidən formalaşan geosiyasi arxitekturasında simvolik və strateji mərhələdir:
"Bu tədbirdə Türkiyə Prezidenti Rəcəb Tayyib Ərdoğan və Pakistan Baş naziri Şahbaz Şərifin iştirakı isə bu hadisənin təkcə yerli deyil, transregional əhəmiyyət daşıdığını aydın şəkildə ortaya qoyur.
Bu hadisə Cənubi Qafqazda postmünaqişə dövrünün əsas aktorlarını və yeni yaranan güc mərkəzlərini önə çıxarır. Azərbaycan regionda sülhü bərpa edən və öz ərazi bütövlüyünü təmin edən aparıcı qüvvədir. Türkiyə bu prosesi hərbi, diplomatik və siyasi baxımdan dəstəkləyən etibarlı strateji tərəfdaşdır. Pakistan isə təkcə ideoloji yaxınlıqla deyil, eyni zamanda gələcəkdə Çinlə Cənubi Qafqazı birləşdirəcək ticarət marşrutlarında mühüm rol oynaya biləcək ölkə kimi çıxış edir.
Laçın Hava Limanı, Zəngəzur dəhlizi və Bakı-Tbilisi-Qars dəmir yolu ilə birlikdə Azərbaycanın "geoiqtisadi körpü" strategiyasının vacib halqasını təşkil edir. Bu hava limanı bir tərəfdən Şərqi Zəngəzuru Naxçıvan və Zəngilanla birləşdirir, digər tərəfdən isə Azərbaycanın ərazi suverenliyi ilə bağlı beynəlxalq ictimaiyyətə aydın mesaj verir".
Politoloq əlavə edib ki, Ərdoğan və Şərifin açılış mərasimində iştirakı yalnız dostluq və qardaşlıq münasibətlərinin təzahürü deyil, eyni zamanda geosiyasi əhəmiyyət daşıyan bir siqnaldır:
"Cənubi Qafqaz artıq təkcə Rusiya və Qərbin maraq dairəsində deyil, eyni zamanda müsəlman dünyasının da diqqət mərkəzindədir.
Türkiyə bölgədə həm NATO üzvü, həm də müsəlman türk dövləti olaraq xüsusi mövqeyə sahibdir. Pakistan isə Çin və Orta Asiya ilə əlaqələri nəzərə alındıqda, Azərbaycanın "Cənub–Cənub" əməkdaşlığı kontekstində önəmli strateji tərəfdaşa çevrilə bilər.
Bütün bu mənzərə Azərbaycanın artıq "kiçik regional oyunçu" deyil, "geostrateji nizamlayıcı" rolunda çıxış etdiyini göstərir. Laçın Hava Limanı isə bu yeni rola xidmət edən əsas logistik platformadır".
