Fransa Prezidenti Emmanuel Makron bildirib ki, Ukrayna münaqişəsi tezliklə həll edilməsə, Avropa və ABŞ-nin təhlükəsizlik məsələlərində etibarı sarsılacaq.
Teleqraf xəbər verir ki, o, bu barədə Sinqapurda keçirilən Şanqri-La Dialoq Təhlükəsizlik Konfransında çıxışı zamanı bildirib.
Makron çıxışında qeyd edib ki, ABŞ və avropalıların Ukraynadakı vəziyyəti qısa müddət ərzində həll edə bilməməsi onların digər regionlarda, o cümlədən Asiyada hər hansı böhranın həllində etibarını əhəmiyyətli dərəcədə azalda bilər.
Fransa prezidenti, həmçinin Asiyada təhlükəsizlik vəziyyətinin pisləşməsi və Qərbin Çinlə rəqabətinin güclənməsi fonunda Ukrayna münaqişəsinin gedişatının Qərbin qlobal nüfuzuna ciddi təsir göstərə biləcəyini vurğulayıb.
Onun sözlərinə görə, hazırkı mürəkkəb beynəlxalq şəraitdə bu münaqişənin həlli beynəlxalq sabitlik üçün vacib şərtdir.
