Yüksəkgərginlikli elektrik xətlərinin altında yerləşən evlərin sənədləşdirilməsi asanlaşa bilər.
Xezerxeber.az-ın məlumatına görə, artıq bir müddətdir ki, yüksəkgərginlikli hava xətləri yeraltı kabellərlə əvəzlənir. Hazırda hava limanı, Zığ şosesi və 8 Noyabr prospektindəki beş yerdə bu işlər icra olunur.
Əmlak məsələləri üzrə ekspert Elnur Fərzəliyevin sözlərinə görə, görülən bu işlər sayəsində sözügedən ərazilərdə tikilmiş çoxsaylı evlər üçün çıxarış problemi də öz həllini tapmış olacaq.
Qeyd edək ki, yüksəkgərginlikli hava xətlərinin yeraltı kabellərlə əvəzlənməsi digər ərazilərdə də planlaşdırılır.
Əmlak eksperti Ramil Qasımzadə “Sherg.az”a bildirib ki, sənədsiz evlərin sənədləşdirilməsi ilə bağlı iş gedir:
“Yüksəkgərginlikli elektrik xəttlərinin altında yerləşən evlər mühafizə zonasındadırsa, onların sənədləşdirilməsi mümkün olmayacaq. Lakin burada müəyyən istinsanlar ola bilər. Əgər yüksəkgərginlikli xəttlərin kənardan keçirilməsi, yaxud yeraltı kabellərlə dəyişdirilməsinə imkan olarsa, həmin evlərin sənədləşməsi mümkün ola bilər. Lakin yüksəkgərginlikli xəttlərin yerinin dəyişdirilməsi və ya yeraltı kabellərlə əvəzlənməsi mümkün olmasa, evlərə çıxarışlar verilməyəcək. Ümumiyyətlə yüksəkgərginlikli xəttlərin altında yaşayan insanlar bilməlidir ki, təhlükə altındadırlar. Yəni bir çox fəsad yaradan xəstəliklər məhz həmin ərazilərdə yaşamanın nəticəsində yaranır. Çünki daim radiasiya altında yaşayan insanlarda müxtəlif pis xəstəliklər, xərçəng baş qaldıra bilər. Bu səbəbdən də vətəndaşların özləri yüksəkgərginlikli xəttlərin altında evlər inşa etməməlidirlər. Yaşayış məskəni həmin yerlərdən ən azı 50 metr kənarda olmalıdır. Hökumət də insanların təhlükəsizliyi baxımından bunu düşünür. Gələcək zamanda xəttlərin altında olan evlərin söküntüsü də reallaşdırıla bilər. Bu səbəbdən də yüksəkgərginlikli xəttlərin altında yerləşən tikililərin çıxarışla təminatı həyata keçirilməyəcək”.
