"Uşağın hər ürəyi istədiyini, istədiyi həyatı deyil, sizin onun üçün seçdiyi həyatı verin"
Professor Fərhad Mehdiyev qızının faciəvi ölümündən sonra valideynlərə tövsiyə xarakterli müraciət edib.
Sherg.az xəbər verir ki, motosiklet qəzasında qızını itirən professor sosial şəbəkə hesabında paylaşdığı fikirlərdə valideynlərin övladlarının həyatına daha diqqətli yanaşmasının vacibliyini vurğulayıb. O bildirib ki, son illərdə qızının həyat seçimlərinə sərbəst yanaşıb və bu gün yaşadığı ağrının fonunda digər valideynlərə səslənməyi özünə borc bilib:
“Son 2 ildir ki mən qızımın tərbiyyəsinə ciddi qarışmırdım, - reklam çəkib pul qazanırdı, hətta mənə "ata bloqqerlər vəkillərdən çox pul qazanır" deyirdi. Bir tərəfdən müstəqil, digər tərəfdən də doğru bir həyat yaşamasını istəyirdim. Mən onun həkim olmasını istəyirdim, tibbə hazırlığa getməkdə də bütün xərclərini qarşılayacağımı demişdim. Fikrini dəyişə bilmirdim, o da incəsənətdə oxumaqda israrlı idi.
Övladlarınız üzərində ciddi nəzarəti əldən verməyin. Sizə "pis ata", lap "abyuser" desinlər; səbrlə uşaqlarınızı 23- 25 yaşına qədər yönləndirməyə, nəzarət etməyə davam edin.
Siz onlara nəzarət etməsəniz - "öz həyatım var, işlərim çoxdur" deyə - bir gün peşmanlığınız və ağrılarınıza, mənəvi əzablarınıza nəzarət edə bilməyəcəksiniz.
Uşağın hər ürəyi istədiyini, istədiyi həyatı deyil, sizin onun üçün seçdiyi həyatı verin. Sevgi, qayğı və nəzarətdən ibarət bir tərbiyə vermək hər bir valideynin funskiya və borcudur.
Həyatda ən böyük investisiya uşaqlarınızdır, o məsələdə udsanız, digər heç bir şeydə udmasanız belə, sizə qəm yoxdur. Övlad məsələsində uduzan valideynin isə əslində heç bir qazancı, təsəllisi yoxdur”.
