Gürcüstanın Baş naziri İrakli Kobaxidze Hökumətlərarası İqtisadi Komissiyasının 10-cu sessiyasında bildirib ki, rəsmi Tiflis Azərbaycan-Türkiyə-Gürcüstan üçtərəfli əməkdaşlıq formatına böyük əhəmiyyət verir:
“Şübhəsiz ki, qeyd olunan mexanizmin müxtəlif istiqamətlərdə uğurlu işləməsi ümumi maraqlarımıza daha da çox fayda gətirəcək. Ölkələrimiz müdafiə, mədəniyyət, təhsil, ətraf mühitin mühafizəsi, kənd təsərrüfatı, səhiyyə, turizm, gömrük sahələrində sıx əməkdaşlıq edir. Biz bu sahələrdə əməkdaşlığı daha da inkişaf etdirməyə və dərinləşdirməyə hazır olduğumuzu bildiririk".
Kobaxidzenin açıqlamasını "Sherg.az"a şərh edən türkiyəli tarixçi-alim, 19 May Universitetinin professoru İbrahim Tellioğlu deyib ki, qloballaşan dünyada regional sabitlik böyük bir önəmə sahibdir:
"Qara Dənizin şimalındakı Ukrayna-Rusiya müharibəsi, eyni şəkildə Suriyadakı müharibənin regiona mənfi təsirləri hər kəsə məlumdur. Bu baxımdan, Qafqazda siyasi sabitliyin olması üçün Türkiyə, Gürcüstan və Azərbaycan münasibətləri çox əhəmiyyətlidir. Sovet İttifaqının dağılmasından bəri Gürcüstan, Türkiyə və Azərbaycan ilə həm siyasi, həm də iqtisadi sahələrdə möhkəm bağlar quraraq, Ermənistanla müqayisədə öz əhəmiyyətini daha da artırıb. Ümumiyyətlə Gürcüstan coğrafi olaraq Orta Asiya, Qafqaz və Avropa arasında strateji bir mövqedə yerləşir. Az öncə də qeyd etdiyim kimi rəsmi Tiflis bu üstünlüyünü dostluq əlaqələrini gücləndirərək öz xeyrinə çevirməyi bacarıb. Xüsusilə Ukrayna müharibəsindən sonra ticarət mallarının böyük bir hissəsi Gürcüstan üzərindən daşınır. Bu mənada Gürcüstan mühüm bir logistika mərkəzinə çevrilib".
Ekspert əlavə edib ki, 44 günlük Vətən Müharibəsi zamanı, İranın özünü İslam dövləti adlandırmasına baxmayaraq məscidlərdə donuz saxlayan Ermənistanın tərəfində yer alarkən, Gürcüstan regional əməkdaşlığı davam etdirmək məqsədiylə Azərbaycanın ərazi bütövlüyünü müdafiə edib və müharibə zamanı Ermənistanın yardım göndərən Rusiya silahlarının Gürcüstandan keçməsinin qarşısını alıb:
"Həmin dövrdə Rusiya Müdafiə Nazirinin Gürcüstanı açıq şəkildə təhdid etməsinə baxmayaraq, rəsmi Tiflis bu mövqeyindən geri çəkilməyib. Mədəniyyətlərarası münaqişəsinin hakim olduğu bir dünyada, Türkiyə, Gürcüstan və Azərbaycan Mədəniyyətlərarası Uzlaşma Nəzəriyyəsinin canlı bir nümunəsini təşkil edir. Üç ölkə arasındakı güclü münasibətlər, Cənubi Qafqazda sülhsevər bir mühitin yaranmasına mühüm töhfələr verib. Bunun digər ölkələrə də yayılması halında, region xalqları və ölkələri, xarici müdaxiləyə ehtiyac olmadan öz məsələlərini həll etmək qabiliyyətinə sahib ola bilər. Hesab edirəm ki, Gürcüstanın regional sabitlik istiqamətində atdığı addımlar uzun müddət Qafqaz regionunda daha balanslı və müstəqil bir mühitin yaranmasına töhfə verəcək".
