ABŞ-ın yeni seçilmiş Prezidenti Donald Tramp Azərbaycan və Ermənistan arasında sülhə nail olmaq üçün "qızıl fürsətə" malikdir. Bu barədə “Voll Strit Journal” bildirib. Qeyd olunub ki, bu iki ölkə öz fikir ayrılıqlarını həll etməyə can atır və bu, ABŞ-ın maraqlarına xidmət edəcək.
Tramp Ukraynada müharibəni həll etməklə bağlı vəd verib, amma demək asandır, etmək çətin. Daha az səy tələb edən, lakin əhəmiyyətli faydalar vəd verən sülh imkanı var. Ermənistan və Azərbaycan arasında uzun müddətdir davam edən düşmənçiliyə son qoymaq. İki ölkə son bir il ərzində danışıqlar aparıb və dönüş nöqtəsindədirlər. İki müharibəyə səbəb olan bu münaqişənin həlli əlçatandır.
Politoloq Aytən Qurbanova “Sherg.az”a vurğulayıb ki, Tramp administrasiyası dövründə Amerikanın Cənubi Qafqaz siyasəti sələfindən fərqli olaraq daha çox sülh və sabitliyin təmin olunması istiqamətində real addımların atılması ilə müşayiət oluna bilər:
“Xüsusilə də, sülh danışıqları çərçivəsində 17 bənddən 15 bənd üzrə razılıq əldə olunduğunu nəzərə alsaq, sülhə kifayət qədər yaxın olduğumuzu aydın şəkildə ifadə edə bilərik. İndiki məqamda Amerikanın ya da hər hansı bir üçüncü tərəfin sülhə töhfə verə biləcək əsas addımı Ermənistanın silahlandırılmasının dərhal dayandırılaraq öhdəliklərin icrası ilə bağlı təsir mexanizmlərindən istifadə olunması ola bilər. Trampın da bu istiqamətdə addımların atılmasında maraqlı olduğunu verilən bəyanatlardan müşahidə etmək mümkündür. Ona görə də, onun prezidentliyi dövrü ilə bağlı ssenarilər daha çox qlobal sistemin münaqişələrinin həlli və ya hərbi əməliyyatların aktiv olduğu bölgələrdə atəşkəsin əldə olunması mərhələsinə daxil olacağı ilə bağlı ehtimalları xüsusilə diqqət mərkəzində saxlamağa imkan verir. Təbii ki, bu ehtimallar nə qədər real olsa da, mövcud şəraitdə Ermənistanın silahlandırlmasında birbaşa iştirak edərək sülhə mane olan dövlətlərdən birinin də məhz ABŞ olduğunu unutmamaq lazımdır”.
