Dövlət rəhbərliyində siyasi balans, ictimai rəy və sosial məsuliyyət önəmlidir
"İlon Maskın təyinatı Amerika kimi dövlətin sabitliyinə ciddi risk yaradacaq.
İki trilyon dollarlıq aqressiv ixtisar təklifləri bu riskin ilkin işartısıdır".
Bu sözləri “Sherg.az"a açıqlamasında iqtisadçı-ekspert Eldəniz Əmirov deyib.
Sahibkarlıq və dövlət idarəçiliyinin fərqli bacarıqlar tələb etdiyini vurğulayan ekspert qeyd edib ki, kimsə yaxşı biznes idarəedicisi olubsa və bir şirkəti uğura apara bilibsə, bu onun makro uğur qazana biləcəyi demək deyil:
“Dünyanın əksər ölkələrində bu fakt öz təsdiqini tapır. Hansısa bir biznesdə uğurlu idarəçi olan birini gətirib yüksək dövlət məmuru təyin edəndən sonra özünü doğrultmur. Əksinə, aləmi bir-birinə qataraq, problemləri artırır.
Çünki dövlət maliyyəsi və büdcə idarəçiliyi özəl sektor idarəçiliyindən köklü şəkildə fərqlənir. Sahibkarlar bazar şərtlərinə uyğun çevik qərarlar verir, lakin dövlət idarəçiliyi mürəkkəb bürokratik proeslərə əsaslanır və sosial məsuliyyət daşıyır”.
Maska gəldikdə isə E.Əmirov bildirib ki, Maskın riskə meyilli və qeyri-ənənəvi idarəçilik üslubu Amerika kimi dövlətin sabitliyini poza bilər:
“Digər bir tərəfdən onun fiskal siyasət və makroiqtisadiyyat sahəsində təcrübəsi yoxdur. Dövlət büdcəsini idarə etmək yüksək səviyyədə makroiqtisadi bilik, fiskal siyasət və monetar mexanizmləri anlamağı tələb edir. Fiskal siyasət təkcə xərcləri azaltmaqdan ibarət deyil; iqtisadiyyatda balansı qorumaq üçün düzgün vergi siyasəti, sosial proqramların idarə edilməsi və borc dinamikasının nəzərə alınması tələb olunur. Həmçinin İlon Mask biznes qərarlarında çox vaxt aqressiv strategiya tətbiq edir. Dövlət idarəçiliyində isə qısamüddətli qənaət tədbirləri uzunmüddətli iqtisadi və sosial problemlərə səbəb ola bilər.
Mask açıq fikirli və sərt ifadələri ilə tanınır. Amma dövlət rəhbərliyində siyasi balans, ictimai rəy və sosial məsuliyyət önəmlidir. Buna görə də İlon Maskın rəhbərlik tərzi və prioritetləri dövət büdcəsi və fiskal siyasəti idarə etmək üçün uyğun deyil. Maskın riskə meyilli və eksperimental yanaşmaları burada ciddi problemlərə yol aça və uzun sabitliyi poza bilər. Bunu da zamanla görəcəyik”.
Qeyd edək ki, İlon Mask federal xərclərin effektivliyinə nəzarət məqsədilə yaradılmış yeni dövlət qurumuna rəhbərlik edir. Bu agentlik Hökumətin Effektivliyi Departamenti (DOGE) adlanır.
