Sünik vilayətində (Qərbi Zəngəzur – red.) Fransaya konsulluq açmağa icazə verən Ermənistan hökuməti Rusiyanın eyni istəyini üç ildir rədd edir.
Teleqraf xəbər verir ki, bu barədə “Past” qəzeti məlumat yayıb.
Erməni nəşri bildirir ki, iyunun 2-də Qafan şəhərində Fransanın fəxri konsulluğunun açılışı olacaq:
“Fəxri konsul milliyətcə ermənidir, Gorus Frankofoniya Mərkəzinin direktoru Karmen Apuntsdur. Rəsmi Parisin niyə Sünikdə baş konsulluq əvəzinə fəxri konsulluq açmaq qərarına gəldiyi hələ də məlum deyil. İran hələ 2022-ci ildə Qafanda baş konsulluq açıb. Sünikdə Fransa konsulluğunun açılması ilə bağlı danışıqlar 2022-ci ilin sentyabrından gedirdi.
Həmçinin Nikol Paşinyan hökuməti Sünikdə Rusiya baş konsulluğunun açılması təklifinə mane olmaq üçün əlindən gələni edir. Rusiya illərdir Sünikdə baş konsulluq açmaq niyyətindən danışır. Rusiya xarici işlər naziri Sergey Lavrov ötən həftə İrəvanda erməni həmkarı Ararat Mirzoyanla bu məsələni ətraflı müzakirə etdiyini bildirib və əlavə edib ki, hazırda hazırlıq gedir.
Lavrovun Ermənistana səfərindən sonra Rusiya Xarici İşlər Nazirliyinin sözçüsü Mariya Zaxarova İrəvanı Rusiyanın Qafanda baş konsulluğunun niyə açılmaması ilə bağlı suala cavab verməyə çağırıb. Ermənistan tərəfi isə tələsmir, şərh verməyi önəmsiz sayır.
Ermənistan Xarici İşlər Nazirliyinin sözçüsü Ani Badalyan Zaxarovaya cavabında sadəcə məsələ ilə bağlı müzakirələrin davam etdiyini bildirib”.
“Past”ın fikrincə, Nikol Paşinyan hökuməti Rusiyanın Qafanda baş konsulluğunun açılmasında maraqlı deyil.
