Ermənistanın birinci prezidenti Levon Ter-Petrosyan bütün ermənilərin katolikosu II Qareginlə iyunun 26-da keçirdiyi görüşdə onu sakit dayanmağa, Nikol Paşinyan və komandasının hücumları qarşısında boyun əyməməyə çağırıb.
Teleqraf xəbər verir ki, bu barədə “Joqovurd” qəzeti məlumat yayıb.
Ter-Petrosyan iddia edib ki, Nikol Paşinyanı yaxşı tanıyır, o, dayanmayacaq, qışqıracaq, təhqir edəcək, təxribat törədəcək, amma kilsə və katolikos soyuqqanlılığını itirməməlidir.
II Qaregin də bildirib ki, son vaxtlar ona təhdid və xəbərdarlıqlar gəlir, onu vəzifəsindən getməyə inandırmağa çalışırlar, şantaj edirlər, amma o, müqavimət göstərməkdə davam edir.
Xatırladaq ki, bundan əvvəl Ermənistan Baş naziri Nikol Paşinyan bütün ermənilərin katolikosu II Qaregini subaylıq andını pozmaqda ittiham edib. Paşinyanın sözlərinə görə, subaylıq andını pozaraq övlad sahibi olan Qaregin artıq Erməni Apostol Kilsəsinin rəhbəri ola bilməz. Həmçinin o, katolikosu Ermənistan dövlətinin maraqlarına qarşı fəaliyyətlərdə günahlandırıb.
Ermənistan hökumətinin başçısı Erməni Apostol Kilsəsinə yeni katolikosun seçilməsi üçün seçkilərə və bu məqsədlə koordinasiya şurasının yaradılmasına çağırıb.
