"Uşaqların ailə qayğısı ilə əhatə olunması məqsədilə fəaliyyət davam etdiriləcək".
Bunu Sosial Xidmətlər Agentliyinin sədri Vüqar Behbudov Sosial Xidmətlər Agentliyinin 5 illik fəaliyyətinə dair mətbuat konfransında deyib.
O bildirib ki, 2025-ci il ərzində 220, 2026-cı ildə isə 240 valideyn himayəsindən məhrum olmuş uşağın müəssisələrdən ailə himayəsinə qaytarılması nəzərdə tutulub.
"Eyni zamanda bu il 200, növbəti ildə isə 220 uşağın müəssisələrə düşməsinin qarşısının alınması istiqamətində işlər aparırıq. 2025-ci il üzrə 165, 2026-cı il üzrə isə daha 165 uşağın övladlığa verilməsi planlaşdırılır", - V.Behbudov əlavə edib.
Psixoloq Sevinc Baxışova “Sherg”az-a bildirib ki, ailə kiçik dövlət, uşaqlar isə onun özəyidir:
“Ailənin psixoloji sağlamlığı cəmiyyətə faydalı vətəndaşlar yetişdirməsinə töhfələr verir. Hər bir uşağın yaşamaq hüququ var. Həmçinin hər bir uşaq sağlam mühitdə mədəni və mənəvi cəhətdən inkişaf etməlidir. Valideynlər övladlarını hərtərəfli inkişaf etdirmək, milli və ümumbəşəri dəyərlərə uyğun, humanizm və əxlaqi prinsiplərlə böyütməlidirlər. Ailədə iştirakçı olan şəxslər psixoloji sağlamlıqlarını fikirlərində və davranışlarında vərdişə çevirməlidirlər. Uşağın ailə ilə münasibəti fərqli müstəvidə inkişaf edir. Şəfqət və sevgi misalı olan ailəni bir-birinə bağlayan da uşaqlardır. Bu ocağı analar daha çox sevgisiylə, atalar da söz sahibi olmasıyla sönməyə qoymurlar. Uşağın inkişafı, empatiya hissinin ona nümunə göstərilməsidir. Ümumiyyətlə uşaq valideynləri arasındakı münasibəti olduğu kimi qəbul edir. Valideynlərlə ünsiyyət uşağın dünyagörüşünün yaranmasına əhəmiyyətli təsir göstərir ki, bu da onun həyata baxışlarını və fikirlərini inkişaf etdirməyə şərait yaradır. Uşağın inkişafı, eyni zamanda, ailədə ünsiyyətin necə təşkil olunmasından asılıdır, yəni ünsiyyət aydın olmalı və koqnitiv münasibət istisna edilməlidir. Hər bir dövlət gələcəyi üçün fiziki və mənəvi cəhətdən sağlam nəsil böyütməyə qadir, mənəvi təməlləri sarsılmaz olan ailə institutunun formalaşmasında maraqlıdır. Güclü ailə həm də güclü dövlət deməkdir”.
