Uşaq üçün oyuncaq, ilk dost, ilk müəllim və ilk güzgüdür
Oyuncaq mütləq şəkildə beynəlxalq təhlükəsizlik standartlarına uyğun olmalıdır.
Teleqraf xəbər verir ki, bunu Səhiyyə Nazirliyi Respublika Uşaq Sanatoriyasının şöbə müdiri Aysel Həsənova deyib.
Həkimin sözlərinə görə, CE və ya ISO sertifikatına malik məhsulların seçilməsi, həmin oyuncağın müəyyən keyfiyyət və təhlükəsizlik meyarlarına cavab verdiyini göstərir.
Psixoloq Zeynəb Əyyubova “Sherg.az”a bildirdi ki, oyuncaqlar uşağın psixoloji inkişafına birbaşa təsir edir:
“Oyuncaqlar uşağın emosional və idrak inkişafında mühüm rol oynayır. Uşaq oyuncaqlarla oynayarkən həm fantaziyasını ifadə edir, həm də sosial bacarıqlar, empatiya, problem həll etmə və dil inkişafı kimi sahələrdə irəliləyiş göstərir. Əslində, oyuncaq uşağın daxili dünyasını ifadə etdiyi bir “dil”dir. Beynəlxalq təhlükəsizlik standartlarına uyğun olmayan oyuncaqlar istər fiziki, istərsə də psixoloji baxımdan uşaqlarda xroniki qorxu, narahatlıq, aqressiya, özünəinam əskikliyi və yuxu pozuntuları kimi problemlərə səbəb ola bilər. Xüsusilə qorxuducu və aqressiv xarakterli oyuncaqlardan uzaq durmaq lazımdır. Rəng və forma uşağın emosional dünyasında mühüm yer tutur. Parlaq və isti rənglər (sarı, narıncı, yaşıl) pozitiv emosiyalar yaradır. Kəskin bucaqlı, qorxulu formalı və ya çox tünd rəngli oyuncaqlar isə uşağın psixikasında mənfi izlər qoya bilər. Hər bir oyuncaq uşağın yaşına və emosional ehtiyacına uyğun seçilməlidir. Oyuncaq sadəcə əyləncə vasitəsi deyil, uşağın ruhuna toxunan, onun şəxsiyyətini formalaşdıran bir vasitədir. Valideynlər seçim edərkən yalnız material və qiymətə deyil, psixoloji uyğunluğa da diqqət yetirməlidirlər. Uşaq üçün oyuncaq, ilk dost, ilk müəllim və ilk güzgüdür”.
