Belçikalı kişi evlənmək məqsədi ilə fransız gözəllik kraliçası ilə görüşmək üçün 760 km yol qət edib. Amma sonradan anlayıb ki, o, onlayn fırıldağın qurbanı olub.
Teleqraf BBC-yə istinadən xəbər verir ki, 76 yaşlı Mişel Fransada Sofi Vuzelonun evinə gəlsə də, onu modelin əri qarşılayıb.
O, Vuzelonun əri Fabienə bir neçə həftədir Vuzelo ilə romantik münasibətdə olduğunu düşündüyünü deyib. Qeyd edib ki, bu münasibətin alınması üçün fırıldaqçılara 30 min avro ödəyib.
Dul qalmış belçikalı bir neçə həftə ərzində "Miss Fransa" yarışının qalibi Vuzelo olduğuna inandığı şəxslə "WhatsApp"da "danışıb".
İyulun 9-da o, Parisdən 420 km cənubda yerləşən Saint-Juliendəki villada yaşayan cütlüyün evinin qarşısına gəlib.
Gözəllik kraliçasının əri belçikalı kişinin qarşısında çıxıb və eşitdiklərinə təəccüblənib: "Mənə dedi ki, Sofi Vuzelonun gələcək əriyəm. Dedim yaxşı, sən gələcək ərisənsə, mən də indiki əriyəm. Mən ona aldadıldığını izah etməyə çalışdım və polisə müraciət etməyi məsləhət bildim".
