ABŞ və Filippin arasında yeni ticarət müqaviləsi imzalanıb.
Trend xəbər verir ki, bu barədə ABŞ Prezidenti Donald Tramp "Truth Social" platformasında paylaşım edib.
Trampın sözlərinə görə, Filippin Prezidenti kiçik Ferdinand Markosun Vaşinqtona səfərindən sonra ölkələr arasında "açıq bazar və sıfır tariflər" prinsiplərinə əsaslanan ticarət sazişi bağlanıb.
"Filippin 19% tarif ödəyəcək. Bundan əlavə, biz hərbi sahədə əməkdaşlıq edəcəyik", – deyə Tramp bildirib.
Xatırladaq ki, aprelin 2-də Tramp 185 ölkə və ərazidən idxal olunan məhsullara rüsumlar tətbiq ediləcəyini elan etmişdi. Bu qərara əsasən:
10%-lik universal tariflər aprelin 5-dən,
Fərdi tariflər isə aprelin 9-dan qüvvəyə minib.
Eyni zamanda bəzi cavab tarifləri 90 gün müddətinə dayandırılıb və bu dövrdə yalnız 10%-lik universal tarif tətbiq olunur.
İyulun 7-də Tramp ticarət sövdələşmələri üçün son tarixi iyulun 9-dan avqustun 1-nə qədər dəyişdirən sərəncam imzalayıb.
İyulun 9-da isə Tramp Filippin prezidentinə məktub göndərərək avqustun 1-dən etibarən əlavə məhdudiyyətlərin tətbiq ediləcəyini bildirib.
Yeni müqavilə çərçivəsində tərəflər iqtisadi və hərbi əməkdaşlığı daha da dərinləşdirməyə razılaşıblar.
