Erməni əhalisi baş naziri kilsə ilə mübarizəsində dəstəkləyir
Ermənistanın Baş naziri Nikol Paşinyan bütün ermənilərin katolikosu II Qareginin devrilməsi ilə bağlı hazırladığı fəaliyyət planını dərc edib. Baş nazir bu barədə “Facebook” hesabında yazıb. Onun fikrincə, yeni katolikos seçkiləri kilsənin orta əsr nizamnaməsi əsasında Erməni Apostol Kilsəsinin yeni Nizamnaməsi təsdiq edilənə qədər keçirilməməlidir.
Qədim erməni dilində deyil, hamının başa düşdüyü müasir erməni dilində olacaq bu Nizamnaməni Milli Kilsə Şurası təsdiq etməlidir. Bundan sonra Paşinyan dürüstlüyü yoxlanılacaq namizədlərin iştirak edəcəyi seçkilərin keçirilməsini təklif edir. Namizədlərin uyğunluğu, seçki proseduru da Nizamnamə ilə müəyyən edilməlidir. Qeyd edək ki, Ermənistan hökuməti ilə Erməni Apostol Kilsəsi arasında qarşıdurma Paşinyanın sosial şəbəkədə yüksək rütbəli ruhanilərə qarşı son dərəcə sərt ifadələr və ittihamlar səsləndirdiyi paylaşımlarından sonra kəskinləşib. Daha sonra o, bütün ermənilərin katolikosunun seçilməsi qaydasına dəyişiklik edilməsini təklif edib və bu prosesdə dövlətin həlledici rolunun təsbit edilməsini nəzərdə tutub.
Politoloq Əlimusa İbrahimov deyib ki, Nikol Paşinyan nəyə getdiyini çox gözəl bilir. Siyasi şərhçi bildirib ki, Paşinyan qarşıya qoyduğu məqsədə nail olacağını düşünməsəydi, buna getməzdi:
"Bu gün Paşinyan əleyhinə səsləndirilən fikirlər, sabiq Prezident Levon Ter-Petrosyanın xəbərdarlıq məktubu sadəcə müxalifətin qalan hissəsinin baş nazir tərəfindən darmadağın edilməsinin qarşısını almaq məqsədi güdür. Paşinyan qətiyyətlidir. Əgər baş nazir 2026-cı ildə keçiriləcək seçkilərdə qalib gəlmək istəyirsə, mütləq qarşısında duran bütün maneələri aradan qaldırmalıdır. Hazırda baş nazirin önündə duran əsas maneə erməni kilsəsi və onun rəhbəri II Qaregin dayanır. Digər məsələlər köməkçi formasındadır. Rusiya tərəfindən Ermənistana göndərilmiş Samvel Karapetyan da ölkəni qarışdırmaq və kilsəyə yardım etmək niyyətində idi. Karapetyanın ilk açıqlamaları da məhz kilsənin müdafiəsi yönündə idi. Paşinyan kilsəyə qarşı mübarizədə çox ciddidir. Fərqindədir ki, kilsəni zərərsizləşdirə bilməzsə, 2026-cı ildə seçkidə ciddi problemlərlə üzləşər. Ona görə də kilsəyə qarşı hücumu hər gün genişləndirir. Paşinyan təkcə Qaregini dəyişdirmək məqsədi güdmür, həmçinin kilsədə reformalar aparmaq fikrindədir. Baş nazir Ermənistan hökumətinin kilsəyə yox, kilsəsinin hökumətə tabe olmasını istəyir. Bu məsələdə erməni əhalisi də Paşinyanın tərəfindədir".
