Çin xarici işlər nazirinin sonuncu açıqlaması ölkə administrasiyasının ABŞ-dakı yeni rəhbərliyə mesajı kimi qiymətləndirilməlidir
Çin ABŞ-ı strateji təhlükəsizliyə xələl gətirən hərəkətləri dayandırmağa çağırır.
Bunu Çinin xarici işlər naziri Van Yi deyib.
O bildirib ki, xüsusilə, Vaşinqton milli təhlükəsizlik siyasətində nüvə silahının rolunu azaltmalı, nüvə ittifaqlarının yaradılmasından imtina etməli, orta mənzilli raketləri digər dövlətlərin sərhədləri yaxınlığında yerləşdirməməli və qlobal raketdən müdafiə sistemini inkişaf etdirməyi dayandırmalıdır.
Politoloq Tural İsmayılov "Sherg.az"a deyib ki, Pekin və Vaşinqton arasındakı münasibətlər Trampın Çindən gələn malların rüsumunu qaldırması ilə bağlı tətbiq etdiyi iqtisadi siyasət nəticəsində gərginləşir:
"Nəzərə almaq lazımdır ki, Trampın hakimiyyəti dövründə ABŞ və Çin arasındakı ənənəvi rəqabət mühitinin daha konstruktiv formada davam edəcəyini gözləyə bilərik. Ağ Evin yeni rəhbərliyində iqtisadi kimlik və iqtisadi siyasət əsas avanqardlardan biridir. Ona görə də bundan sonra Tramp administrasiyasının xarici siyasət kursunda iqtisadi maraqlar və konsepsiyalar ön planla yer tutacaq. Bu mənada ABŞ-Çin əlaqələrində hər hansı gərginlik fonları yaşanmayacaq. Lakin bu dövlətlər arasında əzəli rəqabət var. İki böyük siyasi gücün dünyadakı qlobal patronajlığına iddiaları onları həmişə bir-birinə qarşı qoyur. Bu baxımdan Çin xarici işlər nazirinin sonuncu açıqlaması ölkə administrasiyasının ABŞ-dakı yeni rəhbərliyə mesajı kimi qiymətləndirilməlidir".
Politoloqun fikrincə, hər bir halda Vaşinqton da diplomatik səviyyələrdə Çinin açıqlamasına cavab verəcək:
"Lakin Pekin özəlliklə bu il ərzində Tayvanla bağlı daha çox addımlar ata bilər. Son dövrlərdə Çinin Tayvan yaxınlığındakı hərbi təlimləri də çoxaltması özünün Vaşinqtonla qarşıdurma səviyyəsini daha da dərinləşdirir. Ümumiyyətlə Çin və ABŞ bir-birlərinə qarşı ittihamlar səsləndirsələr də, Pekinin əsas məqsədi Ağ Evi Tayvanla bağlı siyasətində müəyyən yumşalmalara təhrik etməkdir".
