Prezident Donald Trampın Qəzza zolağında ABŞ-ın uzunmüddətli sahibliyi ehtimalı ilə bağlı açıqlamaları Ağ Evin yüksək vəzifəli rəsmilərini heyrətə gətirib. Bu barədə “The New York Times“ qəzeti mənbələrə istinadən məlumat yayıb. Məlumata görə, prezidentin çıxışı kənardan rəsmi və düşüncəli görünsə də, ondan əvvəl Dövlət Departamenti və Pentaqonun nümayəndələri ilə belə hallarda tələb olunan məsləhətləşmələr aparılmayıb. Nəşr qeyd edir ki, Müdafiə Nazirliyinin bu təşəbbüsün dəyərini hesablamaq və onu həyata keçirmək üçün nə qədər hərbçinin lazım olduğunu və hansı plana əməl edəcəklərini düşünmək imkanı belə olmayıb. Bir neçə ABŞ rəsmisi “The New York Times“a bildiriblər ki, onlar hələ də ideyanın necə yarandığını anlamağa çalışırlar və bunu hətta Tramp üçün də həddən artıq hesab edirlər.
Sosial Tədqiqatlar Mərkəzinin sektor müdiri, politoloq Tural İsmayılov “Sherg.az”a vurğulayıb ki, Donald Tramp tərəfindən müxtəlif açıqlamalar verilir:
“Trampın təkcə Qəzza zolağı ilə bağlı deyil, fərqli coğrafiyalarla əlaqədar açıqlamaları mövcuddur. Həmin açıqlamalar fonunda Donald Trampın bunu sadəcə olaraq sözdə qoyacağını və yaxud praktiki həyata keçirəcəyini zaman göstərəcək. Amerika Birləşmiş Ştatlarının Qəzza zolağında uzunmüddətli mövcudluğu çox ciddi müzakilər tələb edən məsələdir. Birincisi ABŞ-nin daxilində Trampın belə bir qərar alacağı təqdirdə konsensusun olub-olmayacağı bəlli deyil. Digər tərəfdən isə Amerikada Trampın sözügedən qərarı fərqli siyasi qüvvələr tərəfindən dəstəklənsə də, İsrail, Türkiyə və başqa dünya ölkələrinin necə reaksiya verəcəyi suallar doğurur. Eyni zamanda Həmas və Fəth hökümətinin Amerikanın Qəzza zolağında uzunmüddətli sahibliyinə dəstək olacağı da sual altındadır. Tramp tərəfindən verilən bu açıqlamanın reallaşması bir az müəmmalı məsələdir”.
