Rusiya Ermənistanın antirus addımlarına hələ ki ekspertlərin diliylə cavab verir
Ermənistanın Baş naziri Nikol Paşinyanın ölkəsinin Kollektiv Təhlükəsizlik Müqaviləsi Təşkilatındakı fəaliyyətini dondurduğunu söyləməsi Moskva-İrəvan münasibətlərini gərginləşdirib. Ermənistan parlamentinin spikeri Alen Simonyan KTMT-yə sual ünvanladıqlarını, lakin bunun cavabsız qaldığını diqqətə çatdırıb: “Biz soruşduq ki, KTMT-nin məsuliyyət zonası haradadır, siz Ermənistan Respublikasının sərhədlərini tanıyırsınızmı, Ermənistan hansı sərhədlər çərçivəsində KTMT-yə qoşulub? Hələlik bunlara cavab yoxdur. Mənim şəxsi fikrim budur ki, KTMT özü-özünü söndürüb və fəaliyyət göstərmir”. Kremlin sözçüsü Dmitri Peskov isə bildirib ki, Ermənistanın KTMT-yə üzvlüyünü dondurması ilə bağlı mövqeyi araşdırılacaq: "Ermənistanın KTMT-yə üzvlüyünü dondurması ilə bağlı mövqeyinə hələlik aydınlıq gətirilməyib". Simonyan hesab edir ki, Rusiya sərhədçiləri Zvartnots hava limanında xidmətini dayandırmalıdır. O, rusiyalı sərhədçilərə güvənmədiyini deyib: “Çünki biz ölkəmizin sərhədlərini qoruyacağıq, lakin onların qoruyacağına əmin deyiləm”. “Demokratik Platforma” fondunun direktoru Qaregin Miskaryan iddia edib ki, KTMT hərbi məlumatları alandan sonra düşmənlərə (Azərbaycan nəzərdə tutulur – red.) ötürür: “Çünki KTMT bizim müttəfiqimiz deyil. KTMT timsalında Rusiya indiki mərhələdə bizim düşmənimizdir. Bu bizim maraqlarımızın birbaşa toqquşduğu dövlətdir. Bu gün Kremldə oturanlar cinayətkardırsa, biz Rusiya Federasiyası ilə hər cəhətdən əlaqəmizi kəsməliyik. Bizim problemimiz rus xalqı ilə deyil, KTMT ilədir”.
Belarus Prezidenti Aleksandr Lukaşenko isə Ermənistanın qurumdan uzaqlaşmasını faciə kimi görməyin əleyhinə olduğunu söyləyib: “Biz buna tamamilə sakit reaksiya veririk. KTMT-də olmaq istəməsələr, o, dağılmayacaq, məhv olmayacaq”.
Politoloq Qabil Hüseynli “Sherg.az”a deyib ki, Rusiya İrəvanın antirus addımlarına ekspertlərin diliylə cavab verir və adekvat addımlara keçməzdən qabaq Ermənistana xəbərdarlıq edir. Analitik qeyd edib ki, İrəvan isə daha da irəli gedir:
"Paşinyana Qərbdən söz veriblər ki, Rusiyanın təcavüzü ilə üzləşərlərsə, onlar Ermənistanı qoruyacaqlar. Təminat sözü alan Paşinyan və komandası bəzi arqumentlərlə KTMT-nin əleyhinə çıxışlar edirlər. Hətta tələb edirlər ki, KTMT-dəki fəaliyyəti dondurmaq yox, ümumiyyətlə, təşkilatdan çıxmaq lazımdır. İnanmıram ki, tərəflər qarşılıqlı ittihamlardan başqa hansısa ciddi addım atsınlar. Rusiya hazırda Ukrayna ilə müharibə şəraitindədir. Qərb Ukraynanı hərtərəfli dəstəkləyir, Kiyevə yeni silahlar verir. Belə məqamda Rusiyanın Ermənistana ciddi anlamda təzyiq göstərməsi zəif ehtimaldır. Kreml anlayır ki, Ukraynadan sonra daha bir dövlətə savaş açmaq Rusiyanı çökdürər. Paşinyan da bunu bilir və Rusiyadan uzaqlaşmaq istiqamətində addımlar atır".
