Ukrayna Prezidenti Volodimir Zelenski bu yaxınlarda Rusiya Prezidenti Vladimir Putinin mayın 9-da hərbi parad keçirə bilməsi üçün hücumu müvəqqəti olaraq dayandırmağa razılıq verib. Bu, Ukraynaya indi hərbi əməliyyatların dayandırılması üçün şərtlərini diktə etmək imkanı verildiyini göstərir.
Teleqraf xəbər verir ki, bu barədə “New York Post” (NYP) yazıb.
Nəşr bildirib ki, Ukraynanın Rusiyaya qarşı uzaqmənzilli hücum kampaniyası əvvəllər ABŞ-nin hərbi yardımından çox asılı olub. Amma ötən il Tramp administrasiyası Kiyevə yardımı kəskin şəkildə azaldıb, indi Rusiyaya ən çox zərər verən silahlar Ukraynanın özündə istehsal olunur.
Fransa Prezidenti Emmanuel Makron da bundan əvvəl Ukraynanın hazırda aldığı kəşfiyyat məlumatlarının üçdə ikisinin Parisdən ötürüldüyünü açıqlamışdı. Bu, ABŞ-nin Ukraynadakı müharibənin sona çatmasında rolunun necə azaldığını göstərir.
Nəşr xatırladıb ki, “National Review”in müxbiri Cim Geraqti Putinin “NATO-nun Rusiya sərhədlərinə genişlənməsi” qorxusundan Ukraynaya tammiqyaslı hücumunu lağa qoyub: “Amma bu, Finlandiya və İsveçi alyansa qoşulmağa sövq etdi, buna görə də Rusiya hazırda NATO üzvləri ilə 2000 kilometrdən çox sərhədi bölüşür”.
NYP Putinin müharibəsinin özünə qarşı çevrildiyini vurğulayıb. ABŞ-nin müharibənin dayandırılması üzrə Rusiyanın xeyrinə olan yanaşmasına baxmayaraq, Ukraynanın hələ də özünü gücləndirmək və düşməni dəf etmək imkanı var.
