Donald Tramp müharibəni yaza qədər bitirməyi hədəfləyir. Bu barədə “İndependent” nəşri məlumat yayıb. Nəşrin məlumatına görə, Zelenskinin adamı, “Xalqın xidmətçisi” fraksiyasının rəhbəri David Araxamiya Trampın andiçmə mərasimində fəxri yerdə olub. Bundan sonra o, Ukrayna mətbuatına bildirib ki, indi rəsmi Ukrayna nümayəndə heyətinin Vaşinqtona səfəri gözlənilir və gələn ay ABŞ prezidenti ilə görüşəcək.
Qeyd edilib ki, Ukrayna ilə bağlı narahat olanlar Araxamiyanın andiçmə mərasimində iştirakını nəzərə almalıdırlar. Bu, Donald Trampın prosesin sonunda Ukraynanın yaxşı anlaşma əldə etməsini təmin etmək niyyətini göstərən çox mühüm addım idi.
Politoloq Sultan Zahidov “Sherg.az”a vurğulayıb ki, Trampın müharibəni bitirmə məsələsi onun seçkiqabağı kampaniyasından bu günə qədər gündəmdədir:
“Amma cəbhədəki və siyasi-diplomatik reallıq heç də Trampın verdiyi bəyanatlara uyğun gəlmir. Tramp seçki ərəfəsində müharibəni 48 saat ərzində bitirəcəyini söyləmişdi. İndi isə yaza qədər müharibəni bitirməsi ilə bağlı məlumatlar yayılır. Amma Ukrayna, Rusiya tərəfinin atəşkəs və sülh sazişi ilə bağlı mövqeləri fərqlidir. Vladimir Putin birmənalı şəkildə deyir ki, bizə atəşkəs razılaşması lazım deyil. Çünki biz cəhbədə irəliləyirik. Eyni zamanda qed edir ki, atəşkəsdən sonra Ukraynanın möhkəmlənib yenidən Rusiyaya hücum etməyəcəyinə heç kəs təmin edə bilməz. Ukrayna tərəfi isə bəyan edir ki, atəşkəsin imzalanarsa, Ukraynaya iki yüz minlik Avropa kotingenti yerləşdirilməlidir ki, Rusiyanın mümkün hücumunun qarşısını alsın. Rusiya da Ukraynada Avropa hərbi kontingentinin yerləşdirilməsinə heç zaman razı olmayacaq. Xatırlatmaq lazımdır ki, Rusiyanın Ukraynaya hücumunun əsas səbəblərindən biri də Ukraynanın NATO-ya inteqrasiyası və NATO infrastrukturunu Rusiya ilə sərhədlərinə gətirmək idi. Yəni belə olan halda Tramp çalışacaq ki, savaşın bitməsində müəyyən rol oynasın. Bu hadisə Trampın adını tarixə yazacaq addım ola bilər. Digər tərəfdən Tramp və Putin arasında danışıqların baş tutması gözlənilir. Lakin sülh sazişinin imzalanması yaxın zamanda baş tutmayacaq. Ümumiyyətlə Donald Tramp Ukraynanın savaşdan tam məğlub ayrılmasını da istəmir. Çünki Amerikanın Ukraynadan heç bir nəticə almadan savaşın bitməsi Vaşinqton üçün fiasko olar. Fikrimcə, Amerika-Rusiya və Amerika-Ukrayna arasında diplomatik kanallar vasitəsilə danışıqlar davam edir”.
