Ölkəmiz üçün çətin bir dönəmdə - koronavirus pandemiyasının yayıldığı bir vaxtda məni belə yüksək mükafatla təltif etdiyinə görə Prezident İlham Əliyevə dərin minnətdarlığımı bildirmək istəyirəm.
“Şərəf” ordeni ilə təltif edilməyim fəaliyyətimə verilən yüksək qiymət, mənim üçün böyük şərəfdir. Dövlət tərəfindən göstərilən etimadı doğrultmaq üçün bundan sonra da ölkəmizdə şahmatın inkişafı üçün səylərimi əsirgəməyəcəyəm.
Bu sözləri AZƏRTAC-a məxsusi müsahibəsində Prezident İlham Əliyevin Sərəncamı ilə “Şərəf” ordeni ilə təltif olunan Azərbaycan Şahmat Federasiyasının vitse-prezidenti Faiq Həsənov bildirib.
O, əsası ümummilli lider Heydər Əliyev tərəfindən qoyulmuş idman siyasətinin Prezident İlham Əliyev tərəfindən uğurla davam etdirildiyini bildirərək deyib: “Azərbaycan dünyanın ən güclü idman, o cümlədən şahmat ölkələrindən biridir. İnanırıq ki, idmançılarımız gələcəkdə daha böyük nailiyyətlər qazanacaqlar”.
