"Ağdamdan sonra Füzuli və Zəngilan ən çox minalanmış ərazilər sayılırlar"
"Məlum olduğu kimi, 3 iyul 2021-ci il tarixində Rusiya Federasiyasının təşəbbüsü ilə Ermənistan işğal dövründə Füzuli və Zəngilan rayonlarında basdırdığı təqribən 92 min tank və piyada əleyhinə minalara dair xəritələri Azərbaycan tərəfinə təqdim edildi".
"Sherg.az"ın xəbərinə görə, bu bunu siyasi şərhçi Elçin Mirzəbəyli deyib.
![](https://sherg.az/uploads/editor/8a3c75ed9d54c1d2589f0a69e492933d.jpg)
Analitik vurğulayıb ki, Azərbaycanın yürütdüyü siyasət nəticəsində Ermənistanın daxilində də məğlubiyyətə uğradılmış revanşçı qüvvələr, hərbi-siyasi cinayətkarlar və ortaqların çoxsaylı informasiya resursları mina xəritələrinin ölkəmizə verilməməsi üçün geniş təbliğat aparırdılar:
"Onlar ictimai rəyi bu istiqamətdə kökləməyə çalışır, siyasi hakimiyyəti ən müxtəlif yollarla təhdid edirdilər. Lakin bütün bunlara baxmayaraq, Azərbaycan Ağdamdan sonra ermənilərin Füzuli və Zəngilan rayonlarının ərazisində basdırdığı tank və piyada əleyhinə minalara dair xəritələri əldə edə bildi. Şübhəsiz ki, bu, Prezident İlham Əliyevin diplomatik məharəti və Azərbaycan diplomatiyasının növbəti uğurudur. Azərbaycan Xarici İşlər Nazirliyinin sözügedən məsələ ilə bağlı açıqlamasında qeyd olunduğu kimi, mina xəritələrinin əldə edilməsi işğaldan azad edilmiş ərazilərimizdə Azərbaycan Prezidenti tərəfindən əsası qoyulan tikinti və yenidənqurma layihələrinin həyata keçirilməsini və məcburi köçkünlərin qayıdışı prosesini sürətləndirəcək. Sirr deyil ki, ermənilərin torpaqlarımıza zəhərli toxum kimi səpələdikləri tank və piyadalar əleyhinə minalar işğaldan azad edilmiş ərazilərimizin bərpasına, infrastruktur layihələrinin tez bir zamanda həyata keçirilməsinə ciddi maneələr yaradır".
E.Mirzəbəyliyə görə, hər bir Azərbaycan vətəndaşının həyatı dövlətimiz üçün dəyərlidir:
"92 min minanın xəritələrinin əldə olunması onminlərlə vətəndaşımızın həyatının xilas edilməsi, bölgədə təhlükəsizliyi təmin edən, infrastruktur layihələrinin icrasında iştirak edən həmvətənlərimizin həyat və sağlamlıqlarının qorunması deməkdir. Ağdamdan sonra Füzuli və Zəngilan ən çox minalanmış ərazilər sayılırlar. Həmçinin nəzərə almaq lazımdır ki, bölgədə həyata keçirilən və keçirilməsi nəzərdə tutulan strateji əhəmiyyətli infrastruktur layihələri Ağdam və Füzulu rayonlarının ərazisindən keçir. Bizim üçün mühüm önəm kəsb edən Zəngəzur dəhlizi layihəsinin tez bir zamanda gerçəkləşməsi üçün sözügedən rayonlardakı bərpa, yenidənqurma işlərinin sürətlə reallaşdırılmasına ehtiyac var. Bu, bölgənin gələcəyi üçün də həyati əhəmiyyətə malikdir.
Məhz bu səbəbdən, Ağdam, Füzuli və Zəngilan rayonlarında basdırılmış minaların xəritələrinin əldə edilməsi ölkəmiz üçün strateji önəm kəsb edirdi və buna da nail olundu".