Kliniki Tibbi Mərkəzdə işıqların sönməsinin səbəbi açıqlanıb.
Bu barədə Oxu.Az-a açıqlamasında Mərkəzin İctimaiyyətlə əlaqələr bölməsinin müdiri Elnur Hidayətoğlu deyib.
O bildirib ki, bu gün saat 11:30 radələrində Kliniki Tibbi Mərkəzi elektrik enerjisi ilə təmin edən yüksək gərginlikli hava xəttində açılma baş verib:
“Bu səbəbdən elektrik enerjisi təxminən 10 dəqiqə sonra, saat 11:40-da tam bərpa olunub. Mərkəzin bütün şöbələrində və ya korpuslarında ümumiyyətlə elektrik enerjisinin olmaması ilə bağlı yayılan məlumatlar əsassızdır.
Bildiririk ki, Kliniki Tibbi Mərkəzin ümumilikdə 5 ədəd elektrik generatoru var və həmin zaman onlardan yalnız biri işə düşməyib. Bu da Mərkəzin Poliklinika şöbəsinin işinə təsir edib. Ağır xəstələrin olduğu digər şöbə və bölmələrdə elektrik enerjisinin verilişində problem yaşanmayıb.
Bir daha bildiririk ki, elektrik enerjisinin verilişində baş verən qısa fasiləli problem Kliniki Tibbi Mərkəzin fəaliyyətinə, mərkəzdə olan ağır xəstələrin vəziyyətinə heç bir təsir etməyib”.
12:35
Kliniki Tibbi Mərkəzdə işıqlar sönüb.
Oxu.Az xəbər verir ki, bu barədə məlumatlar sosial şəbəkədə paylaşılıb. Söhbət Kliniki Tibbi Mərkəzin 1-ci korpusundan gedir.
Vətəndaşlar artıq bir saatdan çoxdur klinikada elektrik enerjisinin olmadığını və bu səbəbdən istilik sistemlərində də problemin yarandığını qeyd edirlər.
Eyni zamanda xəstəxanaya müraciət edənlər arasında növbə üstündə mübahisə də yaranıb.
