"Azərbaycan prosesi birbaşa olaraq Ermənistanla həll etməyin tərəfdarıdır”
Aprelin 28-də ABŞ Dövlət katibi Entoni Blinken Azərbaycan Respublikasının Prezidenti İlham Əliyevə zəng edib.
Bu barədə Azərbaycan Prezidentinin Mətbuat Xidməti məlumat yayıb.
Bildirilib ki, Entoni Blinken ilk növbədə Ermənistan ilə Azərbaycan arasında sərhədlərin delimitasiyası sahəsində əldə olunmuş razılaşma ilə bağlı təbriklərini çatdırıb, bunun ABŞ tərəfindən təqdir edildiyini vurğulayıb. Dövlət katibi ABŞ-ın Ermənistan ilə Azərbaycan arasında münasibətlərin normallaşdırılması və sülh gündəliyinin irəli aparılması üçün bundan sonra da dəstək göstərməyə hazır olduğunu bildirib.
Dövlətimizin başçısı iki ölkənin delimitasıya komissiyası tərəfindən əldə olunmuş razılaşmanın ikitərəfli əsasda aparılmış dialoq və qarşılıqlı anlaşma şəraitində keçirilmiş müzakirələrin nəticəsi olduğunu qeyd edib. Prezident İlham Əliyev delimitasiya prosesinin ardınca iki ölkənin sərhədində artıq demarkasiya işlərinin başlanmasının da müsbət bir addım olduğunu vurğulayıb. Dövlətimizin başçısı sülh müqaviləsi üzrə danışıqların davam etdirilməsi üçün Qazaxıstan tərəfinin təklifinə uyğun olaraq tezliklə Azərbaycan və Ermənistan xarici işlər nazirlərinin Almatıda görüşəcəklərini bildirib. Sülh müqaviləsinin və onun əsasını təşkil edən 5 prinsipin təşəbbüskarının Azərbaycan Respublikası olduğunu xatırladan Prezident İlham Əliyev ölkəmizin sülh gündəliyinin bundan sonra da davam etdirilməsi üçün səylərini əsirgəməyəcəyini vurğulayıb və Azərbaycanın bu xüsusda qəti siyasi iradəyə malik olduğunu qeyd edib. Dövlətimizin başçısı bildirib ki, Azərbaycan regionda hər hansı ayırıcı xətlər olmadan inteqrasiya olunmuş Cənubi Qafqaz regional əməkdaşlıq modelinin qurulmasını dəstəkləyir.
Dövlət katibi Entoni Blinken ABŞ ilə Azərbaycan arasında ikitərəfli əlaqələrin gücləndirilməsi üçün ölkəsinin niyyətini ifadə edərək enerji, iqlim, nəqliyyat, COP29 sahələrində əməkdaşlıq məsələlərini qeyd edib. Dövlətimizin başçısı da öz növbəsində Azərbaycanın ABŞ ilə ikitərəfli əlaqələri inkişaf etdirməkdə maraqlı olduğunu vurğulayıb.
Telefon söhbəti zamanı COP29 çərçivəsində Azərbaycan və ABŞ nümayəndə heyətləri arasında əməkdaşlıqdan məmnunluq ifadə olunub.
Entoni Blinken son zamanlarda Azərbaycanda insan haqları ilə bağlı atılmış addımları müsbət qiymətləndirərək, bunun davamlı olması ilə əlaqədar arzusunu ifadə edib.
Prezident İlham Əliyev Azərbaycanın insan hüquqları sahəsində öhdəliklərinə sadiq olduğunu və ölkəmizdə demokratik islahatların davam etdirildiyini diqqətə çatdırıb.
Entoni Blinkenin İlham Əliyevə zəngini “Sherg.az”a dəyərləndirən politoloq Turan Rzayev söyləyib ki, Azərbaycanın prinsip etibarilə Amerika Birləşmiş Ştatları ilə heç bir problemi yoxdur:
“Azərbaycan hansısa məsələdə Amerikaya qarşı əks-mövqe sərgiləməyib. Əksinə olaraq ABŞ bizim maraqlarımıza zidd olaraq Ermənistanla yaxın təmaslar qururdu və silah yardımları edirdi. Bunların hamısı regionda gərginliyi artıracaq faktorlar idi. Azərbaycan da ona görə Amerikaya xəbardarlıqlar edir, etirazlarını bildirirdi. Amma sülh gündəliyinin bundan sonrakı mərhələsində Amerikanın Azərbaycana necə töhvə verəcəyi sual altındadır. Azərbaycan prosesi birbaşa olaraq Ermənistanla həll etməyin tərəfdarıdır”.
Ekspert bildirib ki, Azərbaycan konstriktiv vasitəçiliyə də yox demir:
“Məsələn, sülh danışıqlarında Almaniya vasitəçi olmasa da, yanaşması olduqca müsbət idi və prosesi irəli aparmağı bacardı. Amerika ilə münasibətlərin normallaşdırılması mümkündür. Amma sülhlə bağlı hansısa faydalarının olması gözlənilən deyil. Onsuz da sülhə dair sənədin 70-75 faizi hazırdır. Qazaxın 4 anklav olmayan kəndinin geri qaytarılması çox müsbət haldır. Amma sülhlə bağlı mühüm addımlar Ermənistanla rəsmi danışıqlar əsasında baş tutub”.
