Artıq uğur, sülh və inkişaf hekayəsi yazmağın zamanıdır
Türkiyə Prezidenti Rəcəb Tayyib Ərdoğan Azərbaycanın Müstəqillik Günü münasibətilə keçirilən tədbirdə çıxış edib.
Sherg.az xəbər verir ki, Ərdoğan 28 May Müstəqillik Günü Proqramında çıxışında Azərbaycanın Müstəqillik Günü münasibətilə təbriklərini çatdıraraq deyib:
“Göz bəbəyimiz olan Azərbaycanla aramızdakı məhəbbəti, inşallah, daha da gücləndirərək davam etdirəcəyik. Yaxşı gündə olduğu kimi, çətin gündə də Azərbaycan xalqının hər zaman yanında olacağıq.”
Azərbaycan-Türkiyə qardaşlığının daim davam etməsini arzulayan Prezident Ərdoğan əlavə edib:
“Qarabağdakı müstəqillik zəfəri bu gün Azərbaycanı daha da güclü və firavan bir ölkəyə çevirib. O gün yandırılan istiqlal məşəli indi daha qüvvətli şəkildə Azərbaycanın yolunu işıqlandırır. Qarabağın azadlığı ilə bu torpaqlarda yüksələn hər bir səda təkcə zəfərin deyil, həm də bir millətin yenidən dirçəlişinin səsi olur.”
Ərdoğan bu gün Laçın Beynəlxalq Hava Limanının açılışının da onlara nəsib olduğunu bildirərək, iki ölkə arasındakı münasibətlərin yalnız bölgəyə deyil, bütün dünyaya nümunə olacaq səviyyəyə çatdığını vurğulayıb.
Ərdoğan deyib:
“30 ildən sonra əsarətdən qurtulan Qarabağ üçün artıq uğur, sülh və inkişaf hekayəsi yazma zamanıdır. Bu gün keçmişdə yaşadığımız acılardan dərs çıxararaq qalıcı sülhün bərqərar olunmasını, etimadın və yaxşı qonşuluq münasibətlərinin qurulmasını hədəfləyirik.”
