Argentina hökuməti immiqrasiya qanunlarında ciddi dəyişikliklər edib. Yeni fərmana əsasən, ölkəyə daxil olmaq istəyən əcnəbilər tibbi sığorta sənədi təqdim etməli və giriş məqsədini göstərən ərizə ilə müraciət etməlidirlər.
Teleqraf xəbər verir ki, müvafiq sənəd artıq Argentinanın rəsmi dövlət qəzetində dərc olunub.
Fərmanla cinayət törətmiş şəxslərin ölkəyə buraxılması və yaşayış icazəsi alma prosesi də sərtləşdirilib. Eyni zamanda, Argentinada doğulmuş uşağın valideynlərinin daimi yaşayış üçün avtomatik müraciət hüququ ləğv olunub. Bundan sonra onlara yalnız üç ilədək müddətə uzadıla bilən müvəqqəti icazə veriləcək.
Sənəddə, həmçinin xarici vətəndaşlara tibbi xidmətlərin ödənişli əsaslara keçirilməsi planı da təsdiqlənir.
İndi turistlər və müvəqqəti yaşamaq icazəsi olan şəxslər yalnız təcili tibbi yardım xidmətlərindən pulsuz şəkildə istifadə edə biləcəklər.
