Narkotik ittihamı ilə həbs edilən "Vaqa" ləqəbli tiktoker Vüqar Zeynalzadə azadlığa buraxılıb.
Teleqraf xəbər verir ki, bu barədə qərar Bakı Apellyasiya Məhkəməsinin hakimləri tərəfindən qəbul edilib.
Qərara görə, Vüqar Zeynalzadənin barəsində seçilmiş həbs qətimkan tədbiri ev dustaqlığı qətimkan tədbiri ilə əvəz edilib. O, məhkəmə zalından azadlığa buraxılıb.
Qeyd edək ki, mayın 23-də Nərimanov Rayon Məhkəməsinin qərarı ilə Vüqar Zeynalzadənin barəsində seçilmiş həbs qətimkan tədbiri 1 aya qədər uzadılmışdı.
Bundan əvvəl isə ötən ilin dekabrın 26-da tiktokerin barəsində 4 ay müddətinə həbs qətimkan tədbiri seçilmişdi, daha sonra isə bu ilin aprelində onun barəsində olan həbs qətimkan tədbirinin müddəti 2 aya qədər uzadılmışdı.
Vüqar Zeynalzadəyə qarşı Cinayət Məcəlləsinin 234.1-1-ci (satış məqsədi olmadan külli miqdarda qanunsuz narkotik vasitələr və ya psixotrop maddələri saxlama və ya daşıma) maddəsi ilə ittiham irəli sürülüb.
Bu maddənin sanksiya həddi üç ildən səkkiz ilədək müddətə azadlıqdan məhrumetmə cəzasıdır.
