Bu gün, iyunun 27-də Ermənistanın ərazi idarəetmə və infrastruktur naziri Davit Xudatyan müşavirlərindən birinin müşayiəti ilə Türkiyəyə yola düşəcək.
Teleqraf xəbər verir ki, bu barədə “Hraparak” qəzeti məlumat yayıb.
Nazirlikdən bildirilib ki, səfərin məqsədi 30-dan çox ölkənin nəqliyyat nazirlərinin iştirak etdiyi “Nəqliyyat Əlaqələri üzrə Qlobal Forum”da iştirak etməkdir.
“Hraparak” iddia edir ki, Baş nazir Nikol Paşinyan iyunun 20-də Türkiyəyə getnəzdən əvvəl Davit Xudatyan və onun müavini Armen Simonyanla məsləhətləşmələr aparıb, bir sıra məsələləri müzakirə edib:
“Bura Ermənistandan Türkiyəyə mal ixracının, Türkiyədən Ermənistana idxalın, iki ölkə üzərindən qarşılıqlı olaraq malların daşınması, yük maşınlarının ölkələrin ərazilərində hərəkətinin və ya tranzit əlaqələrinin, eləcə də Türkiyə üçün Ermənistan ərazisindən keçid imkanının mümkünlüyü kimi məsələlər daxil olub. Türkiyə səfərinin əsl məqsədinin bu məsələləri konstruktiv şəkildə həll etmək və əlaqələr qurmaq olduğu istisna edilmir”.
