İranın nüvə təhlükəsi aradan qaldırılıb, İsrail ordusunun əməliyyatı bu layihələrin inkişafını uzun müddətlik geri salıb.
"Report" “RİA Novosti”yə istinadən xəbər verir ki, bu barədə İsrail Müdafiə Ordusunun nümayəndəsi Avihay Adrai deyib.
"Əməliyyatın əsas məqsədi İsrail Dövləti üçün həm İranın nüvə layihəsi, həm də raket proqramı tərəfindən təqdim edilən nüvə təhlükəsini və ekzistensial təhlükəni aradan qaldırmaq idi. Bizim qiymətləndirməmizə görə, bu proqramların inkişafını uzun müddətlik geri sala bildik", - A.Adrai qeyd edib.
Agentliyin həmsöhbətinin sözlərinə görə, İsrail ordusu ölkənin siyasi rəhbərliyi tərəfindən qarşıya qoyulan bütün vəzifələri yerinə yetirib.
İranın ali lideri, ayətullah Əli Xamenei daha əvvəl 12 günlük münaqişənin yekunları üzrə Tehranın Tel-Əviv üzərində qələbəsini elan edib, İran xalqını İsrail üzərində qələbə münasibətilə təbrik edib.
İranın Səhiyyə Nazirliyinin rəsmi nümayəndəsi Hüseyn Kermanpur bildirib ki, İsrailin İran ərazisinə hücumları nəticəsində 620-dən çox insan ölüb, 4 870 nəfər xəsarət alıb. Öz növbəsində İsrail isə 20-dən çox ölən və 1 470-dən çox yaralanan barədə məlumat yayıb.
