ABŞ böyük olmayan 150-ə yaxın ölkədən idxal edilən mallara 10-15% idxal rüsumları tətbiq etməyi planlaşdırır. Bu barədə "Real America's Voice" telekanalına müsahibəsində ABŞ Prezidenti Donald Tramp deyib.
Xatırladaq ki, aprelin 2-də D.Tramp 185 ölkənin məhsullarına gömrük rüsumunun tətbiq ediləcəyini bəyan edib.
Millət vəkili Azər Badamov "Sherg.az"a bildirib ki, ABŞ -nin 150 ölkəyə 10-15% rüsum tətbiq etməyi planlaşdırması əsasən bu ölkəyə malları ixrac edən ölkələrin iqtisadiyyatılarını müəyyən çətinliklərlə üzləşdirəcək:
“Azərbaycanın ABŞ-a ixracı isə heç də böyük rəqəmlərlə ifadə olunmur. Belə ki, Azərbaycanla ABŞ arasındakı ticarət dövrüyyəsi 2025-ci ildə 2,2 dəfə artaraq 461 milyon dollar təşkil edib. Azərbaycandan ABŞ-a ixrac 48% artaraq 24 milyon dollar, ABŞ-dan Azərbaycana idxal isə 2,2 dəfə artaraq 436,9 milyon dollar olub. ABŞ-a idxal-ixrac balansımızdan göründüyü kimi Azərbaycan əsasən ABŞ-dan idxal edir. ABŞ isə ancaq idxala rüsumlar tətbiq edir. Bu baxımdan ABŞ-ın rüsum siyasətinin Azərbaycan iqtisadiyyatına heç də nəzərə çarpacaq təsiri olmayacaq. Amma bu rüsum siyasəti dünya iqtisadiyyatında müəyyən çətinliklərin meydana gəlməsinə səbəb olacaq”.
