Rusiyanın Almaniyadakı casusluq fəaliyyətləri artır.
Sherg.az xəbər verir ki, Almaniya Hərbi Kəşfiyyat Xidmətinin (MAD) məlumatına görə, rus kəşfiyyat xidmətlərinin casusluq cəhdləri və diversiya fəaliyyətlərində ciddi artım müşahidə olunub.
MAD rəhbəri Martina Rozenberq Almaniya xəbər agentliyi DPA-ya verdiyi açıqlamada deyib: “Casusluq və hibrid tədbirlər sahəsində halların güclü şəkildə artdığını deyə bilərik. Fəaliyyətlər daha intensiv və daha aqressiv xarakter alıb.”
Rozenberq bildirib ki, Rusiya kəşfiyyat xidmətləri Soyuq Müharibə dövründəki kimi hərəkət edir və casusluq vasitələri də genişləndirilib. O əlavə edib: “Casusluğa qarşı ən yaxşı müdafiə bu təhlükəni ciddi qəbul etmək, siqnallara diqqətlə reaksiya vermək və aidiyyəti orqanları vaxtında məlumatlandırmaqdır.”
MAD-ın məlumatına əsasən, Rusiyanın Almaniyadakı casusluq cəhdləri son bir ildə demək olar ki, 2 dəfə artıb. Rus agentlərin üçüncü ölkələr vasitəsilə Almaniyaya daxil olmağa davam etdikləri bildirilir.
Müdafiə Nazirliyinə tabe olan MAD silahlı qüvvələrin qorunmasına, radikalizmin qarşısının alınmasına və hərbi qulluqçularla mülki əməkdaşların təhlükəsizlik yoxlamalarına cavabdehdir.
Moskva, 18 iyulda Almaniya ilə olan hərbi-texniki əməkdaşlıq razılaşmasından geri çəkilmişdi.
NATO, Rusiyanın qarşıdakı 5 il ərzində Avropaya hücum edə biləcəyindən narahatdır. Avropa ölkələri isə Ukrayna ilə müharibənin başlamasından bəri mümkün bir müharibəyə qarşı hazırlıqlar aparır.
