Türkiyə Prezidenti Rəcəb Tayyib Ərdoğan, İsrailin Qəzzaya hücumlarına və İsrailin Baş naziri Benyamin Netanyahunun “Qüds bizim şəhərimizdir” açıqlamasına reaksiya verib.
Sherg.az xəbər verir ki, Ankarada şəhid və qazilərin ailə üzvlərinin dövlət qurumlarına yerləşdirilməsi mərasimində çıxış edən Prezident Ərdoğan deyib:
“Biz bu coğrafiyada nə qonağıq, nə də işğalçıyıq. Biz bu coğrafiyada ev sahibiyik. Min ildir buradayıq, qiyamətə qədər də burada olacağıq. İndi biriləri çıxıb bizə söz atır, tarix dərsi keçməyə çalışır. Heç kim çıxıb bizə tarix dərsi verməsin”.
İsrailin Qəzzaya hücumlarına da reaksiya verən Ərdoğan deyib:
“Başında Qəzza qəssabı Netanyahu olan qətliam şəbəkəsi hər gün bir ölkəyə hücum edərək zülmdə və barbarlıqda sərhəd tanımır. 23 aydır bütün insanlığın gözləri önündə həyata keçirilən bu soyqırıma ən güclü reaksiya yenə türk xalqından və Türkiyə Cümhuriyyətindən yüksəlir. Bizə sataşanların iki-üç nəsil əvvəl gəldikləri torpaqlarda əsrlər boyu hökmranlıq etmişik, bütün cahana nizam vermişik, ədalətin qılıncı olmuşuq. Bölgəmizi sabitsizliyə məhkum etməyə yönəlmiş planlar, inşallah, baş tutmayacaq. İmperialist və siyonist qan tökücülər gizli niyyətlərinə çatmayacaqlar. Allahın izni ilə hər cür oyunu pozacaq, hər cür ssenarini cırıb atacaq qüdrətə, gücə, potensiala, həmçinin basirət və fərasətə malikik”.
“Şəhidlərin mənəvi kölgələri əsrlərdir olduğu kimi bu gün də bizə yoldaşlıq edir” - deyə Ərdoğan bildirib. “Şəhid və qazi ailələrini daim bağrımıza basmış bir millətik. Bu vətən bizə şəhidlərimizin əmanətidir” ifadələrini işlədib.
Prezident Ərdoğan bugünkü təyinatla birlikdə 55 min 947 şəhid ailə üzvü, qazi və qazi ailə üzvünün dövlət qurumlarında işlə təmin ediləcəyini deyib.
Ərdoğan qeyd edib: “Şəhidlərimizin məzarları, imperialistlərin muzdluğunu üzərinə götürən xəyanət və işğal ocaqlarına qarşı qazılmış bir səngərdir. O səngərlər aşılmadı, aşılmayacaq”.
Terrorun bütün növləri ilə ən təsirli şəkildə mübarizə apardıqlarını bildirən Ərdoğan deyib:
“Milli birlik və həmrəylik ruhumuza pusqu quranların planlarını birlikdə cırıb atdıq. Vətənimizə naməhrəm əllərin toxunmasına imkan vermədik. Çətin imtahanlardan keçdik. Birliyimizə pusqu quranların planlarını pozduq”.
