İxtisarlar qalan hərbçilərin maaş və sosial təminatına yönələcək
Ermənistan ordusunda hərbçilərin işdən çıxarılması prosesi başlayıb. “Hraparak” qəzetinin məlumatında bildirilib ki, son aylarda bir çox hərbçilər, o cümlədən Müdafiə Nazirliyinə tabe olan hərbi hissələrdə xidmət edənlərin bir qismi vəzifələrini itiriblər. Nəşrin məlumatına görə, orduda kütləvi ixtisarlar başlayıb. Əsasən, attestasiyadan keçməyən və nisbətən aşağı maaşla xidmətini davam etdirən hərbçilər işdən çıxarılır.
Hərbçi ekspert Ədalət Verdiyev Sherg.az-a açıqlamasında Ermənstan Müdafiə Nazirliyində ixtisarların gözlənilən olduğunu deyib. Onun sözlərinə görə, 2023-cü ildə qəbul olunan qərara əsasən Ermənistan ordusunda şəxsi heyətin bilik və bacarıqlarının yoxlanılması üçün attestasiyalar keçirilməli idi:
"Erməni hərbi qulluqçuların bir çoxunun fiziki hazırlıq, atəş hazırlığı və ixtisas hazırlığından qeyri-kafi qiymətlər alıb ordudan kənarlaşdırılması gözlənilirdi. Lakin Azərbaycan ilə sülh sazişi istiqamətində ilkin nəticələr əldə olunmadan onların ordudan təxrisi Ermənistan ictimaiyyətində kifayət qədər ciddi rezonanslar yarada bilərdi. İndi isə Ermənistan müəyyən qədər riskə gedərək həmin islahatlara start verib”.
Ə.Verdiyev Ermənistanın hərbi büdcəsinin ölkə iqtisadiyyatı üçün kifayət qədər ağır yük olduğunu da xatırladıb. Onun sözlərinə görə, bu yükü azaltmaq üçün də Ermənistan dövləti ordunun ixtisarına başlamağa qərar verib:
“Ermənistan ordusundakı ixtisarlar həm iqtisadi məcburiyyət, həm də hərbi-texniki zərurətdən irəli gəlir. Qısa müddətdə bu, daxili sosial gərginlik yaratsa da, uzunmüddətli perspektivdə Ermənistan ordusunu “say deyil, keyfiyyət” prinsipinə uyğunlaşdırmaq və dövlət büdcəsini yüngülləşdirmək hədəflənir. Ermənistanın hərbi büdcəsi ölkənin iqtisadi potensialı ilə müqayisədə həddindən artıq böyükdür. Ölkə büdcəsinin mühüm hissəsi ordunun saxlanmasına yönəldilir. Lakin zəif iqtisadi baza buna imkan vermir. Bu səbəbdən hökumət ixtisar yolu ilə həm ordudakı “faydasız” kadrları aradan qaldırmaq, həm də büdcəyə düşən təzyiqi azaltmaq istəyir. İxtisarlar nəticəsində azad olunan maliyyə vəsaiti orduda qalan hərbiçilərin maaşlarına və sosial təminatına yönəldilə bilər. Bu, həm daxili narazılığı azaltmaq, həm də xidmətin cəlbediciliyini artırmaq məqsədi daşıyır”.
