Özbəkistan Prezidenti Şavkat Mirziyoyevin avqustda Azərbaycana səfəri gözlənilir.
Bunu Beynəlxalq Münasibətlərin Təhlili Mərkəzinin təşkilatçılığı ilə keçirilən "Özbəkistan və Azərbaycan: əməkdaşlığın yeni üfüqləri" adlı dəyirmi masada BMTM-nin rəhbəri Fərid Şəfiyev deyib.
F.Şəfiyev Özbəkistana Azərbaycanın ərazi bütövlüyünü dəstəklədiyinə görə təşəkkür edib: “Azərbaycan işğaldan azad edilmiş ərazilərinin bərpası prosesində Özbəkistanın dəstəyini hiss edir”.
Ş.Mirziyoyevin səfəri zamanı Füzulidə Özbəkistan tərəfindən tikilən məktəbin açılışının olacağı gözlənilir.
Planlaşdırılan səfəri “Sherg.az”a dəyərləndirən Türk Ağsaqqalları Birliyinin sədr müavini, “Vikipediya” üzrə mütəxəssis, diaspor üzrə araşdırmaçı-ekspert Elnur Eltürk deyib ki, qardaş Özbəkistanın Azərbaycanın haqq mübarizəsinin yanında olduğu hamıya bəllidir:
“Bu gün Özbəkistan Orta Asiyanın inkişaf edən türk dövlətinə çevrilib. Həm əhalisinin sayına, həm də ərazisinə görə Özbəkistan öndə olan dövlətdir və Türk dünyasında özünəməxsus yeri var. Azərbaycanla da əlaqələri xüsusi diqqətdə saxlanılır və münasibətlərimiz strateji səviyyədə inkişaf etdirilir. Əsas odur ki, qarşılıqlı əlaqələrin inkişaf etdirilməsi ilə ortada real istək və niyyət var. Bu istiqamətdə də addımlar atılır və qarşılıqlı səfərlər intensivləşib. Son illər mədəni-ədəbi əlaqələrin inkişafı da göz qarşısındadır. Bu məsələdə isə Azərbaycan Respublikasının Özbəkistandakı Heydər Əliyev adına Azərbaycan Mədəniyyət Mərkəzinin fəaliyyətini xüsusi qeyd edərdim. Bu fəaliyyət nəticəsində mədəniyyət, incəsənət, elm adamlarının qarşılıqlı səfərləri çoxalıb.
E.Eltürk qeyd edib ki, Vətən müharibəsindən sonra Azərbaycana dünyada diqqət artıb:
“Bir neçə ay əvvəl Türk Ağsaqqalları Birliyinin sədr müavini kimi Özbəkistan parlamentinin – Ali Məclisin vitse-spikeri Əlişir Qədirovla görüşdə iştirak edirdim. Əlişir Qədirov Azərbaycan Milli Məclisinin deputatlarına, Türk Ağsaqqalları Birliyinin rəhbər heyətinə Azərbaycanın Qarabağ zəfəri bütün Türk dünyasının qələbəsi olduğunu bildirdi. Ümumiyyətlə özbək siyasətçiləri Azərbaycana xüsusi diqqətlə yanaşırlar. Həmçinin Özbəkistan Qarabağın bərpasından sonra ilk dəstəyini göstərən türk dövlətlərindən biri olub. Füzulidə 940 uşağın təhsil alacağı məktəbin inşa edilməsi buna bariz nümunədir. Digər tərəfdən Özbəkistan Prezidenti Şavkat Mirziyoyevlə Azərbaycan Prezidenti İlham Əliyev arasında şəxsi münasibətlərin bu əlaqələrə böyük təsiri var. İki lider arasında olan sıx dostluq, qardaşlıq əlaqələrimizin inkişafına böyük təkan verir. Çünki ortada siyasi iradə mövcuddur. Üstəlik, Türkiyənin güclənməyi də Orta Asiyada yeni reallıqlar yaradıb. Bu həm də Türk dövlətlərində inam və arxa hissini gücləndirib. Özbəkistan yeni reallığa uyğun olaraq siyasi kurs aparır. Bu isə ümumtürk maraqlarına cavab verir”.
