ABŞ Prezidenti Donald Trampın İranla müharibəyə son qoyan memorandumunu Fransadakı Versal Sarayında imzalamasının maraqlı təfərrüatları məlum olub.
Sherg.az xəbər verir ki, İngiltərənin “Daily Mail” nəşrinin diplomatik mənbələrə istinadən yaydığı məlumata görə, Tramp Fransa Prezidenti Emmanuel Makronun ev sahibliyi etdiyi rəsmi şam yeməyində iştirak edərkən İranla razılaşmanın yekunlaşdığı xəbərini alıb. Bu məlumatdan sonra o, sənədi gözləmədən dərhal imzalamaq qərarına gəlib.
Qəfil qərardan sonra ABŞ dövlət katibi Marko Rubio gecə saatlarında sarayda memorandumun mətnini çap etmək üçün printer axtarmağa başlayıb. Qısa müddət sonra sənəd hazırlanaraq imza mərasimi təşkil edilib.
Mərasimdən əvvəl masalardakı qablar yığışdırılıb, onların yerinə saziş mətnləri qoyulub. Təxminən 30 nəfərin iştirak etdiyi mərasimdə Tramp sənədi qısa nəzərdən keçirdikdən sonra “Bu, asan olmadı. Buna əmin ola bilərsiniz” deyib.
Məlumata görə, sazişin məhz Versal Sarayında imzalanacağı barədə Fransa hökuməti əvvəlcədən məlumatlandırılmayıb və hadisə fransız rəsmiləri üçün də gözlənilməz olub.
Fransız diplomatik mənbələri isə bu addımın simvolik əhəmiyyət daşıdığını bildirərək, Trampın Versalı seçməsini Makrona göstərilən etimad və hörmətin ifadəsi kimi qiymətləndiriblər.
Beləliklə, İranla müharibəyə son qoyan mühüm razılaşma əvvəlcədən planlaşdırılmış rəsmi mərasimlə deyil, Versal Sarayında son anda təşkil olunan qeyri-adi imza mərasimi ilə tarixə düşüb.
