Zoknyai aviabazasında rotasiya əsasında yerləşdirilən NATO qırıcı təyyarələri 2025-ci ilin iyun ayı ərzində Rusiya Hərbi Hava Qüvvələrinə məxsus təyyarələri Baltikyanı ölkələrin hava sərhədləri yaxınlığında ümumilikdə 21 dəfə müşayiət edib.
Teleqraf xəbər verir ki, bu barədə Litvanın Müdafiə Nazirliyinin yaydığı məlumatda qeyd olunub.
Nazirliyin məlumatında bildirilir ki, NATO təyyarələri bu məqsədlə iyunun 1-də iki dəfə havaya qalxıb, ay ərzində isə ümumilikdə 3, 6, 7 və 3 dəfə müşayiət uçuşları həyata keçirilib.
Hazırda Zoknyai aviabazasında Polşa və Rumıniya Hərbi Hava Qüvvələrinə məxsus səkkiz "F-16" təyyarəsi xidmət aparır. Bu kontingent rotasiya əsasında martın 31-dən Litvada yerləşdirilib.
Litva Müdafiə Nazirliyi vurğulayıb ki, bu müşayiət uçuşları hava məkanına nəzarət çərçivəsində müntəzəm tədbirlərdir. 2025-ci ilin mart ayında NATO qırıcıları belə uçuşları 12 dəfə, apreldə 5 dəfə, may ayında isə 22 dəfə həyata keçirib.
Rusiya tərəfi isə bu məsələyə münasibət bildirərək qeyd edib ki, Kalininqrad vilayətinə və oradan həyata keçirilən uçuşlar beynəlxalq hava məkanından istifadə qaydalarına tam uyğun şəkildə, neytral sular üzərində aparılır.
Qeyd edək ki, Baltikyanı ölkələrin öz hərbi hava qüvvələri olmadığı üçün onların hava məkanına nəzarəti 2004-cü ildən etibarən NATO müttəfiqləri tərəfindən həyata keçirilir. Bu məqsədlə Alyans qırıcıları Litvanın Zoknyai aviabazasında rotasiya əsasında yerləşdirilir. 2014-cü ildən isə missiyanın bir hissəsi Estoniyanın Əmari aviabazasından da icra olunur.
