Oktyabrın 1-də Tbilisidə döyülən 26 yaşlı gənc müəllim Giqa Avaliani klinikada həyatını itirib.
24News.ge xəbər verir ki, hadisə Temka ərazisində baş verib.
Məlumata əsasən, gənc müəllimə bir qrup şəxs hücum edərək onu döyüb və baş nahiyəsindən ağır xəsarətlər yetiriblər. Nəticədə Avaliani bir neçə gün koma vəziyyətində qalıb. Həkimlərin səylərinə baxmayaraq, onun həyatını xilas etmək mümkün olmayıb.
Hadisə ilə bağlı gənc müəllimin anası sosial şəbəkələrdə videomüraciət yayıb və ictimaiyyətdən ədalətin bərpasını tələb edib:
“Bu videonu paylaşın və cinayətkarların cəzalandırılmasını tələb edin, yoxsa onlar sizin uşaqlarınızı da öldürəcəklər. Oğlumu 16-17 yaşlı uşaqlar öldürdülər. Giqanı qrup halında qətlə yetirdilər. Qanunları dəyişin, qatillər yeniyetmələrdir,” – deyə ana videomüraciətində bildirib.
Təsdiqlənməmiş məlumata görə, qanlı insidentdə dörd nəfər iştirak edib, onlardan biri azyaşlı qız olub. Qarşıdurmanın səbəbi kimi qısqanclıq göstərilir.
Daxili İşlər Nazirliyindən verilən məlumata görə, hadisə ilə bağlı istintaq Cinayət Məcəlləsinin 117-ci maddəsi – “qəsdən ağır bədən xəsarəti yetirmə” maddəsi üzrə aparılır.
Rəsmi məlumata əsasən, ağır cinayətdə şübhəli bilinən 17 yaşlı bir oğlan saxlanılıb. Mərhumun ailəsi isə qarşıdurmada iştirak edən bütün şəxslərin müəyyənləşdirilərək ədalət qarşısına çıxarılmasını tələb edir.
