Fövqəladə Hallar Nazirliyi Qəbələdə fərdi evdə baş vermiş partlayışla bağlı məlumat yayıb.
Qeyd olunub ki, nazirliyin “112” qaynar telefon xəttinə Qəbələ şəhəri, M.Mərdanov küçəsində yerləşən fərdi yaşayış evində partlayış baş verməsi barədə məlumat daxil olub.
Məlumatla əlaqədar hadisə yerinə dərhal FHN-in Dövlət Yanğından Mühafizə Xidməti Qəbələ Rayon Yanğından Mühafizə Hissəsinin qüvvələri cəlb olunublar.
Hadisə yerində əməliyyat şəraiti qiymətləndirilərkən vətəndaşa məxsus, ümumi sahəsi 130 kvadratmetr olan birmərtəbəli üçotaqlı fərdi evin mətbəxində, ilkin ehtimala əsasən, məişət qazının sızması nəticəsində yanğınla müşahidə olunan partlayışın baş verdiyi müəyyən edilib.
Partlayış dalğasının zərbəsindən mətbəxin pəncərə çərçivələri yerindən çıxıb, yanğın nəticəsində soyuducunun arxa hissəsində elektrik naqilləri və mətbəxin lambirdən ibarət divar üzlüyü 0,5 kvadratmetr sahədə yanıb. Hadisə nəticəsində xəsarət alan olmayıb.
Fövqəladə Hallar Nazirliyinin qüvvələri tərəfindən ərazidə müvafiq təhlükəsizlik tədbirləri görülüb.
Faktla bağlı araşdırma aparılır.
12:08
Qəbələdə qaz sızmasından yaşayış evində partlayış baş verib.
APA-nin Şirvan bürosu xəbər verir ki, hadisə səhər saatlarında olub.
Nəticədə Qəbələ şəhər sakini Zəkəriyev İlkin Faiq oğluna məxsus yaşayış evinin 130 kvadratmetr hissəsi dağılıb.
Hadisə nəticəsində evə ciddi ziyan dəyib. Xəsarət alan yoxdur.
Faktla bağlı araşdırma aparılır.
