“Sədərək” ticarət mərkəzi tərəfindən icarəyə verilmiş anbarda baş verən yanğının səbəbləri araşdırılır.
Bu barədə Teleqraf-ın sorğusuna cavabda Fövqəladə Hallar Nazirliyindən bildirilib.
Yanğının başvermə səbəbləri barədə hələlik heç bir versiya açıqlanmayıb.
Qeyd edək ki, avqustun 24-də saat 11-50 radələrində Bakı şəhəri, Qaradağ rayonu ərazisində yerləşən “Sədərək” ticarət mərkəzinin anbarında güclü yanğın baş verib.
Dərhal əraziyə Fövqəladə Hallar Nazirliyinin Dövlət Yanğından Mühafizə Xidməti və Xüsusi Riskli Xilasetmə Xidmətinin qüvvələri cəlb olunub. Fövqəladə hallar nazirinin müavini general-mayor Adil Abdullayev hadisə yerində olub.
DİN qüvvələri hadisə yerinin mühafizəsinə və digər zəruri tədbirlərin görülməsinə cəlb edilib.
TƏBİB-dən verilən məlumata görə, yanğınla əlaqəli təcili tibbi yardım briqadasına ümumilikdə 13 nəfərin (hər biri kişi cinsli) müraciəti qeydə alınıb. Onlardan 3 nəfər ilkin tibbi yardımdan sonra Kliniki Tibbi Mərkəzin Toksikologiya şöbəsinə hospitalizasiya olunub. Hər üç şəxsə tüstüdən zəhərlənmə diaqnozu təyin olunub.
