Türkiyənin Şərqi Qara dəniz bölgəsində son günlər toy mərasimlərində atəş açılması nəticəsində ölüm halları artmaqdadır. Keçən həftə Trabzonun Çaykara rayonunda gəlinalma mərasimi zamanı təsadüfi açılan atəş bir nəfərin ölümünə, 2 nəfərin də yaralanmasına səbəb olmuşdu. Bu hadisədən bir həftə sonra oxşar faciə bu dəfə Giresunun Şebinkarahisar rayonunda baş verib.
Sherg.az xəbər verir ki, hadisə dünən gecə Turpçu kəndində qeydə alınıb. İlçə mərkəzində keçirilən toydan sonra Beyzanur Beyazıt ilə Ali Karaca evlərinə yola salınırdı. Bu zaman ailə üzvləri silahla havaya atəş açaraq sevinclərini ifadə edirdilər. Lakin açılan atəş zamanı bəy Ali Karacanın sinəsinə güllə dəyib.
Xəbər verilən kimi hadisə yerinə təcili yardım və jandarma çağırılıb. Ali Karaca Şebinkarahisar dövlət xəstəxanasına çatdırılsa da, bütün müdaxilələrə baxmayaraq xilas edilə bilməyib.
Ərazidə araşdırma aparan jandarma, bəyin bibisi F.K.-nı (47) silahla atəş açmaqda şübhəli bilərək saxlanıb. F.K.-ya məxsus həyətdə 2 ədəd icazəsiz tapança aşkarlanıb. Hadisə ilə bağlı istintaq başladılıb.
