Gürcüstanın Müdafiə Nazirliyi mehriban qonşuluq münasibətləri çərçivəsində Azərbaycan və Türkiyənin müdafiə nazirlikləri ilə əməkdaşlığı davam etdirir. Bu barədə Gürcüstanın Baş naziri İrakli Kobaxidzenin illik hesabatında bildirilib. Sənəddə deyilir ki, Regional təhlükəsizliyin möhkəmləndirilməsi və silahlı qüvvələr arasında sıx əlaqələrin qurulması məqsədi daşıyan Azərbaycan-Türkiyə-Gürcüstan üçtərəfli əməkdaşlıq formatı uğurla fəaliyyət göstərir. Hesabatda vurğulanıb ki, 2024-cü ildə Gürcüstan Azərbaycan-Türkiyə-Gürcüstan müdafiə nazirlərinin üçtərəfli görüşünə və “Eternity” üçtərəfli təliminə ev sahibliyi edib. Qeyd edək ki, İ.Kobaxidze illik hesabatı iyunun 27-də parlamentdə təqdim edəcək.
Türkiyə Müdafiə Sənayesi və xarici siyasət analitiki Suat Delgen Sherg.az-a söyləyib ki, Türkiyə, Gürcüstan və Azərbaycan arasında güclü hərbi əməkdaşlıq mövcuddur:
“Bu üç ölkə regional sabitlik və təhlükəsizliyin təmin olunması üçün birgə hərəkət edir. Həmçinin ortaq hərbi təlimlər də keçirirlər. Cənubi Qafqazda bu ölkələrin birgə fəaliyyəti həm regional sülhə, həm də iqtisadi inteqrasiyaya və təhlükəsizliyə müsbət təsir göstərir. Azərbaycan ilə Ermənistan arasında sülh sazişi imzalandıqdan və iki ölkə arasında mövcud problemlər aradan qaldırıldıqdan sonra, zamanla Ermənistanın da bu əməkdaşlığa qoşulması regional inteqrasiyanın genişlənməsinə və iqtisadi əməkdaşlığın daha da dərinləşməsinə səbəb ola bilər. Bu baxımdan Türkiyə, Azərbaycan və Gürcüstan arasındakı əməkdaşlıq qarşılıqlı etimada, regional inteqrasiyaya və sərhədlərin qorunması prinsiplərinə əsaslandığı üçün Ermənistanın da bu prinsiplərə riayət etməklə həmin əməkdaşlığa qoşulması bütün region ölkələrinin maraqlarına uyğun olacaq. Lakin bunun üçün ilk növbədə Azərbaycan və Ermənistan arasında sülh müqaviləsinin imzalanması və tarixdən qaynaqlanan münaqişə səbəblərinin aradan qaldırılması zəruridir”.
