“Mən namizədliyimi vermədim. Bugünkü seçkidə növbəti 4 il müddətinə Elçin Əliyev seçilib”.
Oxu.Az-ın xəbərinə görə, bunu Azərbaycan Triatlon Federasiyasının sabiq prezidenti Azər Məhərrəmov deyib.
Yeni federasiya prezidenti Elçin Əliyev isə bildirib ki, triatlonu əvvəlki rəhbərin təqdim etdiyi platformada davam etdirəcək:
“Biz bir yerdə bu idman növünü inkişaf etdirməyə çalışacağıq. Triatlonda yaş məhdudiyyəti genişdir. 15-90 yaş aralığında bu yarışda iştirak etmək olar. Bu yarışı Azərbaycanda keçirmək olar. Həmçinin bunu qapalı zalda da təşkil etmək mümkündür. Rəhbərlik etdiyim “Sinam” MMC şirkəti Qafqazda informasiya və texnologiya sahəsi ilə məşğuldur. Təbii ki, federasiyanın bu sahədə problemi olmayacaq. Ancaq maliyyə baxımından sponsorların cəlb olunmasına çalışacağıq”.
Yeni federasiya prezidenti Azərbaycanda 6 yarış keçirməyi planlaşdırdıqlarını vurğulayıb: “Dəmir insan” brendində bir neçə yarışlar təşkil etmək istəyirik. Yarışın şüarı “Üz, sür, qaç” olacaq. Bununla da Azərbaycanda iradəsi güclü insanlar yetişəcək”.
