“Neftçi” PFK-ya yeni idman direktoru təyinatı rəsmiləşib.
Oxu.Az-ın daha əvvəl xəbər verdiyi kimi, bundan sonra bu vəzifəni Zaur Əzizov yerinə yetirəcək.
37 yaşlı mütəxəssis 2008-2021-ci illərdə “Qəbələ” klubunun baş meneceri olub. Qəbələ təmsilçisi bu müddətdə Premyer Liqada iki gümüş (2016/17, 2017/18), üç bürünc (2013/14, 2014/15, 2015/16) medal qazanıb. Bu müddətdə dörd dəfə Azərbaycan kubokunun finalına yüksələn komanda 2018/19 mövsümündə ilk tituluna yiyələnib. Avrokuboklardakı debütü Əzizovun baş menecerliyi dövrünə təsadüf edən “Qəbələ” ardıcıl iki dəfə (2015/16, 2016/17) dörd mərhələ adlamaqla UEFA Avropa Liqasının qrup mərhələsinədək irəliləyib.
Qeyd edək ki, bundan əvvəl “Neftçi”nin idman direktoru vəzifəsini 2018-ci ilin fevralından 2020-ci ilin noyabrınadək Ceyhun Sultanov icra edib.
Xatırladaq ki, “Qəbələ”də boşalan baş menecer funksiyasını isə Nail Kərimov icra edəcək.
