"Məğlubiyyətdən sonra hissləri, hirsləri cilovlamaq çətindir. Oyuna pis başlamadıq. Hətta qol şansı da oldu, amma kapitan Emin Mahmudov iki metrdən qapıya düşə bilmədi".
"Report"un məlumatına görə, bu fikirləri "Neftçi"nin baş məşqçisi Samir Abasov "Qarabağ"a 0:4 hesabı ilə uduzduqları Azərbaycan Premyer Liqasının IX tur oyunundan sonra mətbuat konfransında deyib.
43 yaşlı mütəxəssis keyfiyyətdə rəqibə uduzduqlarını etiraf edib: "Rəqibin futbolçuları əllərinə düşən fürsətlərdən yararlandı. Səviyyə fərqi həddindən artıq görünürdü. Bəzi şeylər var ki, onları düzəldə biləcəyimizə inanmıram. Bu gün yaxşı motivasiyada meydana çıxmışdıq. Ardıcıl qollar bizi sındırdı. Qolları çıxsaq, rəqibə müqavimət göstərdiyimizi deyə bilərəm. Keyfiyyət öz sözünü dedi. Oyunçuların arasında böyük fərq var. Çoxları deyir ki, həddindən artıq dəyişiklik edirsən, amma hər şey ölçülü şəkildə olur. Uduzandan sonra danışmalısan.
Abasov yerli oyunçuların bu cür oyunlara cavab vermədiyini söyləyib: "Emin Mahmudov buna istisnadır. Bizim yaralı yerimiz yerli futbolçulardır".
Baş məşqçi rəqibin gücləndiyini sözlərinə əlavə edib: "Burada "Neftçi"nin də rolu olub. Azarkeşlər yaxşı abu-hava yaratmışdılar. Amma etikadan kənara çıxmasalar daha yaxşı olar. Bizim dərdimiz fanatlar deyil. Qəbul etməliyik ki, yerli futbolçularınmız tələblərimizə cavab vermir. Heç nəyi gizlətmək lazım deyil".
