Mayın 9-da MDB-yə üzv dövlətlərin rəhbərləri Moskvada İkinci Dünya müharibəsində qələbənin 80 illiyinə həsr olunmuş tədbirlərdə iştirak edəcəklər, amma Ermənistan Baş naziri Nikol Paşinyanın səfərinin təfərrüatları hələ də gizli saxlanılır.
Teleqraf xəbər verir ki, bu barədə Ermənistanın “Joqovurd” qəzeti yazır.
Martın 14-də Nikol Paşinyanla Rusiya Prezidenti Vladimir Putin arasında telefon danışığından sonra Kreml bəyan etmişdi ki, Ermənistan baş naziri Rusiya prezidentinin dəvətini qəbul etdiyini və mayın 9-da Moskvada keçirilməsi nəzərdə tutulan tədbirlərdə iştirak edəcəyini təsdiqləyib.
“Joqovurd” məsələ ilə əlaqədar Ermənistan baş nazirinin aparatına sorğu göndərib. Hökumət aparatından sorğuya cavab olaraq bildirilib ki, Ermənistan baş nazirinin ofisi Nikol Paşinyanın bütün səfərləri ilə bağlı vaxtında və lazımi məlumat verir.
“Əldə etdiyimiz məlumata görə, Paşinyan Moskvada gecələməyə hazırlaşır, orada xarici siyasət məsələlərini pərdə arxasında həll etməyə çalışacaq. Məqsəd yenidən Kremlin etimadını qazanmaqdır”, - nəşr qeyd edir.
