İlham Əliyevin ABŞ ilə olan uğurlu siyasi dialoqu, Azərbaycanın beynəlxalq imicinə və turizmə dolayısı ilə müsbət təsir göstərib
Bu ilin yanvar-iyun aylarında Azərbaycana 10 862 nəfər ABŞ vətəndaşı səfər edib.
"APA-Economics" bu barədə Dövlət Turizm Agentliyinin məlumatları əsasında hesablamalar aparıb.
Məlumata görə, bu, ötən ilin eyni dövrü ilə müqayisədə 18% çoxdur.
Cari ilin yanvar ayında Azərbaycana 1 069 nəfər (illik +23,7%), fevral ayında 924 nəfər (illik +11,5%), mart ayında 1 322 nəfər (illik +17,2%), aprel ayında 1 439 nəfər (illik +26,5%), may ayında 2 239 nəfər (illik +7,5%), iyun ayında 2 439 nəfər (illik +22,4%) ABŞ vətəndaşı gəlib.
Azərbaycana gələn ABŞ vətəndaşlarının sayı 2024-cü ildə 22 927 nəfər (illik +35,1%), 2023-cü ildə 16 971 nəfər (illik +37,96%), 2022-ci ildə 12 301 nəfər (illik +2,8 dəfə), 2021-ci ildə 4 400 nəfər (illik +69,04%), 2020-cü ildə 2 603 nəfər (illik -86,12%), 2019-cu ildə 18 759 nəfər (illik +7,2%) təşkil edib.
Turizm eksperti Rəhman Quliyev “Sherg.az”a bildirdi ki, Prezident İlham Əliyevin ABŞ-a səfərləri və xüsusilə Prezident Donald Tramp ilə olan isti münasibətləri də bu prosesə müsbət təsir göstərir:
“Siyasi əlaqələrin yaxşılaşması turizmə yüksək siqnal verir. Yüksək səviyyəli qarşılıqlı münasibətlər ölkənin imicini gücləndirir və ABŞ vətəndaşları üçün Azərbaycanı daha etibarlı və dost ölkə kimi təqdim edir. ABŞ-dan Azərbaycana olan iqtisadi maraq artdıqca, biznes məqsədilə səfər edənlər də sayca çoxalır. Bu da ümumi turizm statistikalarına böyük təsir edir. Tramp admnistrasiyasının verdiyi müsbət açıqlamalar, birbaşa turizmlə bağlı olmasa da, ABŞ ictimaiyyətində və biznes dairələrində Azərbaycan haqqında maraq və müsbət fikirlər formalaşdırır ki, bu hegemon bir dövlətin ölkəmizlə bütün sektorlarda sıx əməkdaşlıgına gətirib çıxaracaq. Eyni zamanda ABŞ rəsmilərinin Azərbaycanla yaxın münasibətləri, ölkəni sabit və təhlükəsiz turistik istiqamət kimi təqdim etməyə kömək edir. İlham Əliyevin ABŞ ilə olan uğurlu siyasi dialoqu, Azərbaycanın beynəlxalq imicinə və bununla da turizmə dolayısı ilə müsbət təsir göstərib. Bu, həm də yeni turist bazarlarının cəlb olunması üçün psixoloji və diplomatik zəmin yaradır”.
