Qlobal enerji bazarının cari reallığını nəzərə alaraq biz öz prioritetlərimizi, siyasətimizi və investisiyalarımızı optimallaşdırmalıyıq.
“APA-Economics” xəbər verir ki, bunu energetika naziri Pərviz Şahbazov Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclaslarında çıxışı zamanı deyib.
Oniun sözlərinə görə, geosiyasi gərginliyə və bazarlardakı volatilliyə baxmayaraq təbii qaz enerji təhlükəsizliyinin ən təməl daşı, strateji zənginlik olaraq qalır və uzun müddət energetikanın mərkəzi komponenti olacaq.
“Bu öz növbəsində, qaz yataqlarına və infrastruktura investisiyaların yatırılmasını tələb edir. Biz vacib reallığı nəzərə alaraq sürətli qərarlar qəbul etməliyik. Belə olmasa lazımi təchizat həcmlərinin təmin edilməsi ümumiyyətlə uğursuzluğa düçar olacaq. Digər bir həqiqət də var ki, dayanıqlı enerji təhlükəsizliyinin təmin edilməsini şaxələndirməyin alternativi yoxdur. Buna görə, enerji həcminin məhz müxtəlif mənbələrdən və marşurtlardan əldə edilməsi enerji təhlükəsizliyinin nəinki, fundamental qarantiyası və müstəqilliyidir, həmçinin Avropa üçün vacibdir. Bu məsələ daimi olaraq prioritet kimi qalmalıdır və ən vacib məqamlarda nəzərdən keçirilməlidir. Azərbaycan qazının əhəmiyyətinə gəldikdə, Cənub Qaz Dəhlizi Avropa üçün strateji zənginlikdir və bu bizim planlarımızın ayrılmaz hissəsidir. Son illərdə Azərbaycan nəinki, etibarlı tərəfdaş kimi öz mövqeyini qoruyub, o cümlədən öz coğrafiyasını xeyli genişləndirib”, - Pərviz Şahbazov qeyd edib.
