Dağlıq Qarabağ bölgəsinin azərbaycanlı icması Şuşadakı Yuxarı Gövhər ağa məscidinin ermənilər tərəfindən “təmir-bərpası” ilə bağlı bəyanat yayıb.
Bəyanatda bildirilir ki, işğal olunmuş Azərbaycan torpaqlarında xalqımıza məxsus mədəni, tarixi və dini irsi məhv edən Ermənistan Şuşada Yuxarı Gövhər ağa məscidinin “təmir-bərpa”sından sonra təxribat xarakterli “açılışına” hazırlaşır:
“Bu işğalçı Ermənistanın və onun əlaltısı olan cinayətkar rejimin işğal olunmuş ərazilərimizdə həyata keçirdiyi qeyri-qanuni fəaliyyətin daha bir bariz nümunəsidir”.
Erməni qəsbkarları xalqımızın bu memarlıq incisinin arxitekturasını dəyişərək, məscidi “fars məscidi” kimi qələmə verməyə çalışırlar. Bu bir daha Ermənistanın işğal olunmuş ərazilərdə azərbaycanlılara məxsus mədəni irsin oğurlanması, izinin itirilməsi və silinməsi ilə məşğul olduğunu göstərir. Yuxarı Gövhər ağa məscidini “fars məscidi” elan etməklə Ermənistan tarixi saxtalaşdırır, onu yenidən yazmağa çalışır. Bu həm də bir daha Ermənistanın saxta tolerant ölkə olduğunu göstərir".
Məsələni dəyərləndirən politoloq Azər Rəşidoğlu Sherg.az-a bildirdi ki, biz nə qədər israr etsək ki, baş verənlər beynəlxalq hüquqa və insanlığa ziddir, heç nə dəyişməyəcək:
“Qarabağda antiterror əməliyyatı keçirib, torpaqlarımıza sahib çıxmalıyıq. Guya o məscid əvvəlki formada təmir edilsə nə olacaqdı ki? Əlimiz ki, çatmır. Bu məsələdə yeganə xoşagəlməz hal ondan ibarətdir ki, torpaqlarımız işğal edilib. Biz işğalla barışa bilmərik”.
