Zəngəzur dəhlizinin açılması məsələsi ABŞ, Ermənistan və Rusiya arasında həllini tapmalıdır
ABŞ Prezidenti Donald Tramp Azərbaycan Prezidenti İlham Əliyevin Xankəndidə keçirilən “Qlobal Şuşa Media Forumu - 2025”dəki çıxışını özünün rəsmi "Truth Social" hesabında paylaşaraq diqqət çəkib. Tramp paylaşımında Azərbaycan liderinin çıxışından 1 dəqiqə 17 saniyəlik videonu təqdim edib. Video Azərbaycanın dövlət başçısının Tramp haqqında yüksək fikirlər bildirdiyi hissəni əhatə edir. Bu, Trampın Cənubi Qafqaz liderlərindən birinə münasibətdə ictimai şəkildə verdiyi ilk açıq dəstək jestlərindən biri kimi qiymətləndirilir. Bunun ardınca Azərbaycan dövlət başçısı Trampa bu jestinə görə təşəkkürünü bildirib. Xatırladaq ki, Prezident İlham Əliyev çıxışında Tramp barədə bunları demişdi: "Tramp müharibə başlatmayan yeganə ABŞ prezidentidir. Onun hakimiyyətdə olduğu qısa müddətdə görünür ki, bu insan müharibələri bitirir". Ölkə rəhbəri vurğulayıb ki, Azərbaycan ABŞ-yə Cənubi Qafqazdakı proseslərə diqqət yetirdiyi üçün minnətdardır: "Biz ona şəxsən Azərbaycan və Ermənistana razılığa gəlməkdə kömək etmək istəyinə görə çox minnətdarıq, baxmayaraq ki, o, beynəlxalq təhlükəsizliyin daha qlobal məsələləri ilə məşğuldur. Cənubi Qafqazdakı vəziyyəti də diqqət mərkəzində saxlayır. Biz Azərbaycanda, əlbəttə ki, onun bir çox səbəblərdən qalib gəlməsinə şadıq və təbii ki, ona işini sona çatdırmağını arzulayırıq".
Politoloq Natiq Miri Sherg.az-a açıqlamasında deyib ki, ABŞ Prezidenti Donald Tramp hakimiyyətə gələndə dünyaya sülh vədləri verib. Ekspert diqqətə çatdırıb ki, Ağ Ev rəhbərinin sülhpərvər prezident kimi tarixə düşmək və Nobel mükafatına layiq görülmək hədəfləri var:
"Prezident İlham Əliyev Qlobal Media Forumunda ABŞ-Azərbaycan münasibətlərindən danışarkən "topu doqquzluğa vurdu" və D.Trampdan dərhal reaksiya gəldi. Dövlət başçısı İlham Əliyevin ABŞ ilə münasibətlər, konkret Tramp haqqında söylədikləri və bunun beynəlxalq səviyyədə işıqlandırılması ABŞ rəhbərinin diqqətini cəlb etdi. Əgər bir məsələ əhəmiyyət kəsb etməsə, heç kim ona diqqət yetirməz. Ancaq fikrin önəmi və onu söyləyənin gücü, ona göstərilən etimad mühüm məqamdır. Dünyada etimad qazanmaq üçün doğru sözlü olmaq lazımdır. Xankəndidə açıq şəkildə beynəlxalq birliyin diqqətinə verilən mesajlar bütün qlobal medianın diqqətini çəkdi. Mesajlar bütün mərkəzlərə çatdı. Donald Trampın reaksiyası da buna adekvat olaraq ortalığa çıxdı. Ən nəhayət, bu fikrin paylaşılması o deməkdir ki, Tramp dövlət başçısının yanaşmasını bölüşür, qəbul və təqdir edir. Bunun ictimailləşdirilməsi həm də Azərbaycan Prezidentinə, dövlətimizin siyasətinə birbaşa dəstəkdir. Bu, birbaşa Azərbaycan lideri, dövlətimiz və xalqımız adına çox müsbət bir hadisədir. Sıradan hadisə deyil".
Analitik əlavə edib ki, ABŞ-nin Zəngəzur dəhlizinə yanaşması bəllidir:
"Zəngəzur dəhlizinin açılması məsələsi ABŞ, Ermənistan və Rusiya arasında həllini tapmalıdır. Çünki Azərbaycanın bir hissəsindən digər bölgəsinə maneəsiz keçid ən yüksək səviyyədə qəbul olunub. Bunu ABŞ də, Ermənistan da prinsipial olaraq qəbul edir. Bundan sonra məsələnin detalları ABŞ, Rusiya və Ermənistan arasında müzakirə olunaraq həllini tapmalıdır. Vaşinqton Azərbaycan-Ermənistan arasında sülhlə bağlı da mütəmadi açıqlamalar verir. Öncə dövlət katibi, ardınca iki dəfə Prezident D.Tramp səviyyəsində sülh prosesinə ciddi dəstək ifadə olunub. ABŞ sülh prosesində vasitəçi olaraq iştirak etmir. Sadəcə, ümumi prosesi dəstəklədiyini açıqlayır ki, bu da İrana, Rusiyaya ciddi çəkindirici mesajdır. Yaxın perspektivdə sülh sənədinin paraflanması gözlənilir".
